കടുവ തിരക്കഥ ഞാൻ വായിച്ചു, അതിൽ എന്‍റെ ജീവിതത്തെ വികലമാക്കി ചിത്രീകരിക്കാൻ ശ്രമം നടന്നിട്ടുണ്ടെന്നും അതിനാൽ റിലീസ് ചെയ്യാൻ അനുവദിക്കില്ലെന്നും കുറുവച്ചൻ
പൃഥ്വിരാജ് നായകനായെത്തുന്ന കടുവ ഒരുവശത്ത്, സുരേഷ് ഗോപിയുടെ 250-ാം ചിത്രമായെത്തുന്ന സിനിമ മറുവശത്ത്. കുറച്ച് നാളായി ഈ രണ്ട് സിനിമകളും ഉയര്‍ത്തിയ വിവാദം കോടതി ഉത്തരവ് വന്നതോടെ ഏതാണ്ട് നിലച്ചതായിരുന്നു. ഇപ്പോഴിതാ ‘കടുവ’യുടെ പുതിയ പോസ്റ്റര്‍ പുറത്തിറങ്ങിയതിന് പിന്നാലെ വീണ്ടും വിവാദങ്ങള്‍ തലപൊക്കിയിരിക്കുകയാണ്. പൃഥ്വിരാജ് നായകനാകുന്ന ‘കടുവ’ സിനിമയുടെ ചിത്രീകരണം പൂർത്തിയായാലും പ്രദർശിപ്പിക്കാൻ അനുവദിക്കുകയില്ലെന്ന നിലപാട് എടുത്തിരിക്കുകയാണ് സാക്ഷാൽ കടുവാക്കുന്നേൽ കുറുവച്ചൻ.
കോടതി കയറിയ രണ്ട് സിനിമയുടേയും അവസ്ഥ വീണ്ടും കാടുകയറുകയാണ്. നിലവിൽ പൃഥ്വിരാജ് നായകനാകുന്ന സിനിമയുടെ ചിത്രീകരണത്തിന് കോടതി അനുമതി നൽകിയിരുന്നു. സുരേഷ്‌ഗോപി നായകനാകുന്ന ചിത്രത്തിന് വിലക്ക് ഏർപ്പെടുത്തിയിട്ടുമുണ്ടായിരുന്നു. അപ്പോഴാണ് പുതിയ അവകാശവാദവുമായി കുറുവച്ചൻ എത്തിയിരിക്കുന്നത്. എന്നാൽ കടുവാക്കുന്നേൽ കുറുവച്ചൻ എന്ന ഞങ്ങളുടെ കഥാപാത്രം സാങ്കൽപിക കഥാപാത്രമാണെന്നും യഥാർഥ കുറുവച്ചനായി ഒരു ബന്ധമില്ലെന്നുമാണ് ‘കടുവ’യുടെ തിരക്കഥാകൃത്ത് ജിനു എബ്രഹാം പറഞ്ഞിരിക്കുന്നത്. മനോരമ ഓൺലൈനിന് നൽകിയ അഭിമുഖത്തിലാണ് ഇരുവരും ഇത് വ്യക്തമാക്കിയിരിക്കുന്നത്.
രണ്ട് സിനിമകളുടെ തിരക്കഥയും വായിക്കാൻ കോടതി അനുവദിച്ചിരുന്നു. ‘കടുവ’യിൽ എന്‍റെ ജീവിതത്തെ വികലമാക്കി ചിത്രീകരിക്കുന്നതിന് ശ്രമം നടന്നിട്ടുണ്ട്. ഇത് അംഗീകരിക്കാനാവില്ല. ഇപ്പോള്‍ ചിത്രീകരണം നടക്കുന്ന സിനിമ പൂർത്തിയായാലും തീയേറ്ററിൽ എത്തിക്കാൻ സമ്മതിക്കില്ല. എന്‍റെ പൂര്‍ണ്ണ സമ്മതത്തോടെ ‘ഗ്യാങ്സ് ഓഫ് കിനോ’ എന്ന യൂട്യൂബ് ചാനൽ വഴി എന്‍റെ ജീവചരിത്രം എട്ടു എപ്പിസോഡുകളിൽ ചിത്രീകരിക്കുന്നത് ‘കടുവാക്കുന്നേൽ കുറുവച്ചൻ’ എന്ന പേരിൽ ഉടൻ പുറത്തിറങ്ങുമെന്നും യഥാർത്ഥ കുറുവച്ചൻ അറിയിച്ചിരിക്കുകയാണ്.
