ദേശീയപാതയിൽ വാഹനാപകടം; യുവാവ് മരിച്ചു

ആറ്റിങ്ങൽ: ദേശീയപാതയിൽ ഉണ്ടായ വാഹനാപകടത്തിൽ യുവാവ് മരിച്ചു. മാമം ഹോണ്ട ഷോറൂമിലെ ജീവനക്കാരനായ കിഴുവിലം മാമം നൈനാംകോണം ശ്യാമാലയം വീട്ടിൽ ഉണ്ണിയുടെ മകൻ ഉമേഷ് (26) ആണ് മരിച്ചത്. വ്യാഴാഴ്ച രാത്രി 11 മണിയോടെ പൂവൻപാറ പാലത്തിന് സമീപം ദേശീയപാതയിലായിരുന്നു അപകടം.ആറ്റിങ്ങൽ ഭാഗത്തുനിന്ന് ആലംകോട് ഭാഗത്തേക്ക് ബൈക്കിൽ സഞ്ചരിക്കുകയായിരുന്ന ഉമേഷും സുഹൃത്തും തൊട്ടുമുന്നിൽ പോയിരുന്ന ആൾട്ടോ കാറിൽ ഇടിക്കുകയായിരുന്നു. കാർ പെട്ടെന്ന് ബ്രേക്ക് ചെയ്തതിനെ തുടർന്നാണ് അപകടമുണ്ടായതെന്ന് പോലീസ് അറിയിച്ചു.

ഇടിയുടെ ആഘാതത്തിൽ ഇരുവരും റോഡിലേക്ക് തെറിച്ചുവീണു. റോഡിൽ വീണ ഉമേഷിന്റെ ദേഹത്ത് കൂടി അതുവഴി എത്തിയ ഇന്നോവ കാർ തട്ടിയതിനെ തുടർന്ന് ശരീരത്തിലും തലയിലും ഗുരുതര പരുക്കേറ്റു. ഉടൻ തന്നെ ആംബുലൻസിൽ ആറ്റിങ്ങൽ വലിയകുന്ന് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ബൈക്കിലുണ്ടായിരുന്ന സഹയാത്രികന് നിസ്സാര പരുക്കുകളോടെ രക്ഷപ്പെടാനായി. സംഭവത്തിൽ ആറ്റിങ്ങൽ പോലീസ് തുടർനടപടികൾ സ്വീകരിച്ചു.