ചെറുന്നിയൂരിൽ വൻ അരയാൽ കടപുഴകി വീണു; ഗതാഗതം തടസ്സപ്പെട്ടു

ചെറുന്നിയൂർ: ഇന്നുപുലർച്ചെയുണ്ടായ ശക്തമായ കാറ്റിൽ ചെറുന്നിയൂരിൽ റോഡരികിൽ നിന്നിരുന്ന വൻ അരയാൽ കടപുഴകി വീണു. ഏകദേശം 38 വർഷം പഴക്കമുള്ള അരയാലാണ് നിലംപതിച്ചത്.പഞ്ചായത്ത് ഓഫീസ് കഴിഞ്ഞ് പുത്തൻകടവ് ഭാഗത്താണ് മരം കടപുഴകി വീണത്. അരയാലിന് എതിർവശത്തുള്ള ഓടിട്ട കെട്ടിടത്തിന് മുകളിലൂടെ റോഡിലേക്ക് പതിച്ചതിനെ തുടർന്ന് വൈദ്യുതി കമ്പികളും പോസ്റ്റുകളും തകർന്നു. ഇതോടെ പ്രദേശത്തെ ഗതാഗതവും വൈദ്യുതി വിതരണവും തടസ്സപ്പെട്ടു.

വിവരമറിഞ്ഞെത്തിയ വർക്കല അഗ്നിരക്ഷാസേന ഇലക്ട്രിക് കട്ടർ ഉപയോഗിച്ച് മരത്തിന്റെ ശാഖകൾ മുറിച്ചുമാറ്റുന്ന പ്രവർത്തനങ്ങൾ ആരംഭിച്ചു. റോഡിന് കുറുകെ വീണുകിടക്കുന്ന വലിയ അരയാൽ മുറിച്ചുമാറ്റി ഗതാഗതം പുനഃസ്ഥാപിക്കുന്നത് അഗ്നിരക്ഷസേനയ്ക്ക് വലിയ വെല്ലുവിളിയായിരിക്കുകയാണ്.

സംഭവസ്ഥലത്ത് പഞ്ചായത്ത് പ്രസിഡന്റിന്റെ നേതൃത്വത്തിൽ പഞ്ചായത്ത് ജനപ്രതിനിധികളും ഉദ്യോഗസ്ഥരും എത്തി രക്ഷാപ്രവർത്തനങ്ങൾ ഏകോപിപ്പിക്കുന്നു. അഗ്നിരക്ഷാസേനയുടെ പ്രവർത്തനങ്ങൾക്ക് പഞ്ചായത്ത് അധികൃതർ ആവശ്യമായ എല്ലാ സഹായങ്ങളും നൽകുന്നുണ്ട്.
പുലർച്ചെ ആരംഭിച്ച മരം മുറിച്ചുമാറ്റൽ പ്രവർത്തനങ്ങൾ നാലു മണിക്കൂറിലേറെയായി തുടരുകയാണ്. ഗതാഗതവും വൈദ്യുതി വിതരണവും പൂർണമായും പുനഃസ്ഥാപിക്കാൻ കൂടുതൽ സമയം ആവശ്യമായി വരുമെന്നാണ് അധികൃതർ അറിയിച്ചത്.