സാങ്കേതിക വീഴ്ച; വേളി ടൂറിസ്റ്റ് വില്ലേജിലെ കളിത്തീവണ്ടി വീണ്ടും കട്ടപ്പുറത്ത്

തിരുവനന്തപുരം: സാങ്കേതിക തകരാറുകൾ സമയബന്ധിതമായി പരിഹരിക്കാതിരുന്നതിനെ തുടർന്ന് വേളി ടൂറിസ്റ്റ് വില്ലേജിലെ മിനിയേച്ചർ കളിത്തീവണ്ടിയുടെ സർവീസ് വീണ്ടും നിലച്ചു. അവധിക്കാല തിരക്കിനിടെ തീവണ്ടി ഓട്ടം നിർത്തിയതോടെ കുടുംബങ്ങളായി എത്തുന്ന വിനോദസഞ്ചാരികൾ നിരാശയിലാണ്.

ഏപ്രിൽ-മേയ് മാസങ്ങളിൽ സഞ്ചാരികളുടെ വലിയ ഒഴുക്കാണ് വേളിയിൽ അനുഭവപ്പെടുന്നത്. എന്നാൽ, പ്രധാന ആകർഷണങ്ങളിലൊന്നായ കളിത്തീവണ്ടി പ്രവർത്തനരഹിതമായതോടെ സന്ദർശകർക്ക് അനുഭവം കുറയുകയാണ്. ടൂറിസം വകുപ്പിന്റെ മേൽനോട്ടത്തിൽ ടൂർ ഫെഡ് കമ്പനിക്കാണ് തീവണ്ടിയുടെ നടത്തിപ്പ് ചുമതല നൽകിയിരിക്കുന്നത്. സാങ്കേതിക പ്രശ്നങ്ങൾ പരിഹരിക്കുന്നതിൽ കമ്പനിയുടെ വീഴ്ചയാണ് തീവണ്ടി കട്ടപ്പുറത്താകാൻ കാരണമെന്ന ആക്ഷേപം ഉയരുന്നു.

സൗരോർജം ഉപയോഗിച്ച് പ്രവർത്തിക്കുന്ന തീവണ്ടിക്ക് ഏകദേശം 2.5 കിലോമീറ്റർ നീളത്തിലുള്ള പാളമാണ് ഒരുക്കിയിരിക്കുന്നത്. വേളിക്കായലിന്റെയും കടലിന്റെയും മനോഹര കാഴ്ചകൾ ആസ്വദിക്കാൻ വിനോദസഞ്ചാരികൾക്ക് ഈ യാത്ര ഏറെ പ്രിയപ്പെട്ടതാണ്. മൂന്ന് ബോഗികളുള്ള തീവണ്ടിയിൽ 48 പേർക്ക് സഞ്ചരിക്കാനാകും. ദിവസേന ഏകദേശം 25,000 രൂപവരെ വരുമാനം ലഭിച്ചിരുന്ന പദ്ധതിയാണ് ഇത്. തീവണ്ടി നിലച്ചതോടെ വിനോദസഞ്ചാര വകുപ്പിന്റെ വരുമാനവും തടസ്സപ്പെട്ടു.

2020 നവംബർ 2ന് മുഖ്യമന്ത്രി പിണറായി വിജയൻ ഓൺലൈനിലൂടെ ഉദ്ഘാടനം ചെയ്ത ഈ പദ്ധതി, ഏകദേശം ഒൻപത് കോടി രൂപ ചെലവിലാണ് സജ്ജമാക്കിയത്. തുടർന്ന് ടൂർ ഫെഡ് കമ്പനിക്കാണ് നടത്തിപ്പ് ഏൽപ്പിച്ചത്.ആറുമാസത്തിലൊരിക്കൽ ബാറ്ററി ഉൾപ്പെടെയുള്ള സാങ്കേതിക ഘടകങ്ങളുടെ പരിപാലനം നിർബന്ധമാക്കിയിരുന്നുവെങ്കിലും, അത് പാലിക്കാത്തതുകൊണ്ടാണ് നിലവിലെ പ്രശ്നമെന്ന് അധികൃതർ സൂചിപ്പിക്കുന്നു.തീവണ്ടിയുടെ ബാറ്ററികൾ കേടായതാണ് സർവീസ് നിലച്ചതിന്റെ പ്രധാന കാരണം. ബാറ്ററികൾ അറ്റകുറ്റപ്പണിക്കായി ബന്ധപ്പെട്ട കമ്പനിക്ക് കൈമാറിയിട്ടുണ്ടെന്നും അടുത്ത ആഴ്ചയ്ക്കകം പുനഃസ്ഥാപിക്കുമെന്ന് ടൂർ ഫെഡ് എം.ഡി. (ഇൻചാർജ്) ബിജു പ്രസാദ് അറിയിച്ചു. തുടർന്ന് തീവണ്ടി വീണ്ടും ഓടിത്തുടങ്ങുമെന്നാണ് പ്രതീക്ഷ.