ചാർജ്ജിങ്ങിനിടെ ഇലക്ട്രിക് സ്കൂട്ടർ തീപിടിച്ച് നശിച്ചു

തിരുവനന്തപുരം: വീട്ടിൽ ചാർജ് ചെയ്യുന്നതിനിടെ ഇലക്ട്രിക് സ്കൂട്ടറിന് തീപിടിച്ച് പൂർണമായും കത്തിനശിച്ചു. കരിക്കകം മാവറത്തല സ്വദേശിയായ സുരേഷ് ബാബുവിന്റെ സ്കൂട്ടറാണ് അപകടത്തിൽ നശിച്ചത്.

വിവരമറിഞ്ഞ് ചാക്ക ഫയർ സ്റ്റേഷനിൽ നിന്ന് അഗ്നിരക്ഷാസേന എത്തി തീ നിയന്ത്രണ വിധേയമാക്കി. അസിസ്റ്റന്റ് സ്റ്റേഷൻ ഓഫീസർ ജി.വി. രാജേഷ്, ഫയർ ആൻഡ് റെസ്ക്യൂ ഓഫീസർമാരായ മനോജ്, ആദർശ് ആർ. കുമാർ എന്നിവരുടെ നേതൃത്വത്തിലായിരുന്നു രക്ഷാപ്രവർത്തനം. അപകടത്തിൽ ആളപായമൊന്നും റിപ്പോർട്ട് ചെയ്തിട്ടില്ല. തീപിടിത്തത്തിന്റെ കാരണം വ്യക്തമല്ല. സംഭവത്തിൽ കൂടുതൽ അന്വേഷണം തുടരുകയാണ്.

ഇലക്ട്രിക് സ്കൂട്ടർ ചാർജിംഗ്: അശ്രദ്ധയ്ക്ക് തീപിടിത്തം വരെ; സുരക്ഷാ മാർഗങ്ങൾ പാലിക്കണമെന്ന് മുന്നറിയിപ്പ്

ഇലക്ട്രിക് സ്കൂട്ടറുകൾ വ്യാപകമാകുന്ന സാഹചര്യത്തിൽ ചാർജിംഗിനിടെ ഉണ്ടാകുന്ന അപകടങ്ങൾക്കെതിരെ ജാഗ്രത ആവശ്യപ്പെട്ട് അഗ്നിരക്ഷാസേനയും വിദഗ്ധരും മുന്നറിയിപ്പ് നൽകി. ചെറിയ അശ്രദ്ധ പോലും തീപിടിത്തത്തിനും വലിയ നാശനഷ്ടങ്ങൾക്കും കാരണമാകാമെന്നതിനാൽ പൊതുജനങ്ങൾ സുരക്ഷാ നിർദ്ദേശങ്ങൾ കർശനമായി പാലിക്കണമെന്നാണ് അഭ്യർത്ഥന.സ്കൂട്ടറിനൊപ്പം നൽകിയ ഔദ്യോഗിക ചാർജർ മാത്രമേ ഉപയോഗിക്കാവൂ എന്ന് അധികൃതർ വ്യക്തമാക്കുന്നു. വ്യത്യസ്ത ചാർജറുകൾ ഉപയോഗിക്കുന്നത് ബാറ്ററി ചൂടുപിടിക്കാൻ ഇടയാക്കും. ചാർജിംഗ് നടത്തുമ്പോൾ വായുസഞ്ചാരം നല്ല സ്ഥലമാണ് തിരഞ്ഞെടുക്കേണ്ടത്; അടച്ചിടങ്ങളിലോ കിടപ്പുമുറികളിലോ ചാർജിംഗ് ഒഴിവാക്കുന്നതാണ് സുരക്ഷിതം.

ബാറ്ററി പൂർണമായി ചാർജ് ആയ ശേഷം ദീർഘനേരം പ്ലഗിൽ ബന്ധിപ്പിച്ചു വെക്കുന്നത് അപകടസാധ്യത വർധിപ്പിക്കും. അതുപോലെ തന്നെ കേടായ വയറുകളോ ലൂസ് കണക്ഷനുകളോ ഉപയോഗിക്കുന്നത് തീപിടിത്തത്തിന് കാരണമാകാം. ചാർജിംഗിനിടെ അസാധാരണമായ ചൂടോ ദുർഗന്ധമോ ശ്രദ്ധയിൽപ്പെട്ടാൽ ഉടൻ വൈദ്യുതി ബന്ധം വിച്ഛേദിക്കണമെന്ന് നിർദേശം.നനഞ്ഞ സ്ഥലങ്ങളിൽ ചാർജിംഗ് നടത്തരുതെന്നും ബാറ്ററിയിൽ വീക്കം, ചോർച്ച തുടങ്ങിയ പ്രശ്നങ്ങൾ കണ്ടാൽ ഉപയോഗം നിർത്തി സർവീസ് കേന്ദ്രത്തെ സമീപിക്കണമെന്നും അധികൃതർ അറിയിച്ചു.

അനധികൃതമായി ബാറ്ററിയിലും ചാർജിംഗ് സംവിധാനത്തിലും മാറ്റങ്ങൾ വരുത്തുന്നതും അപകടസാധ്യത കൂട്ടും.
ഇലക്ട്രിക് വാഹനങ്ങളുടെ ഉപയോഗം വർധിക്കുന്ന സാഹചര്യത്തിൽ സുരക്ഷിതമായ ചാർജിംഗ് രീതികളെക്കുറിച്ച് ജനങ്ങളിൽ ബോധവൽക്കരണം അനിവാര്യമാണെന്ന് അഗ്നിരക്ഷാസേന വ്യക്തമാക്കി.