മാനസികാരോഗ്യ കേന്ദ്രത്തിൽ നിന്നും രക്ഷപ്പെട്ട ദൃശ്യ കൊലക്കേസ് പ്രതി പിടിയിൽ

മുംബൈയിൽ നിന്നാണ് പിടികൂടിയത്; നാളെ കോഴിക്കോട്ട് എത്തിക്കും

കോഴിക്കോട്: കുതിരവട്ടം മാനസികാരോഗ്യ കേന്ദ്രത്തിൽ നിന്നും രക്ഷപ്പെട്ട പെരിന്തൽമണ്ണ ദൃശ്യ കൊലക്കേസ് പ്രതി വിനീഷ് വിനോദ് പിടിയിലായി. മുംബൈയിൽ നിന്നാണ് ഇയാളെ പൊലീസ് പിടികൂടിയത്. പ്രതിയെ നാളെ കോഴിക്കോട്ട് എത്തിക്കുമെന്ന് പൊലീസ് അറിയിച്ചു. കഴിഞ്ഞ വർഷം ഡിസംബർ 29നാണ് വിനീഷ് കുതിരവട്ടം മാനസികാരോഗ്യ കേന്ദ്രത്തിലെ ശുചിമുറിയിലെ ചുമർ തുരന്ന് രാത്രി സമയത്ത് രക്ഷപ്പെട്ടത്. തുടർന്ന് വ്യാപകമായി തെരച്ചിൽ നടത്തിയിരുന്നെങ്കിലും കണ്ടെത്താൻ കഴിഞ്ഞിരുന്നില്ല. ഇതു രണ്ടാമത്തെ തവണയാണ് ഇയാൾ ഇവിടെ നിന്ന് രക്ഷപ്പെടുന്നത്.

2021ൽ പ്രണയാഭ്യർഥന നിരസിച്ചതിനെ തുടർന്ന് പെരിന്തൽമണ്ണ സ്വദേശിനിയായ ദൃശ്യയെ കൊലപ്പെടുത്തിയ കേസിലാണ് വിനീഷ് പ്രതിയായത്. ദൃശ്യയുടെ പിതാവിന്റെ വ്യാപാര സ്ഥാപനത്തിന് തീ വെച്ചതിനുശേഷം വീട്ടിൽ കയറി ആക്രമണം നടത്തുകയായിരുന്നുവെന്ന് പൊലീസ് പറയുന്നു.

റിമാൻഡിൽ കഴിയുന്നതിനിടെ മാനസിക അസ്വാസ്ഥ്യം പ്രകടിപ്പിച്ചതിനെ തുടർന്ന് ഇയാളെ കുതിരവട്ടം മാനസികാരോഗ്യ കേന്ദ്രത്തിൽ ചികിത്സയ്ക്കായി പ്രവേശിപ്പിച്ചിരുന്നു. അവിടെ കഴിയുന്നതിനിടെയാണ് ഇയാൾ രക്ഷപ്പെട്ടത്. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.