അഞ്ചരക്കണ്ടി മെഡിക്കല്‍ കോളേജ് വിദ്യാര്‍ത്ഥിയുടെ മരണം: ആരോപണ വിധേയരായ അധ്യാപകര്‍ക്ക് സസ്‌പെന്‍ഷന്‍

കണ്ണൂര്‍: അഞ്ചരക്കണ്ടി മെഡിക്കല്‍ കോളേജിലെ വിദ്യാര്‍ത്ഥിയുടെ മരണവുമായി ബന്ധപ്പെട്ട് ആരോപണവിധേയരായ അധ്യാപകര്‍ക്ക് സസ്‌പെന്‍ഷന്‍. അനാട്ടമി വിഭാഗം മേധാവി ഡോ. എം.കെ. റാം, അസോസിയേറ്റ് പ്രൊഫസര്‍ ഡോ. സംഗീത എന്നിവര്‍ക്കെതിരെയാണ് നടപടി.
ആഭ്യന്തര അന്വേഷണം പുരോഗമിക്കുന്നതിനിടെയാണ് സസ്‌പെന്‍ഷന്‍.

ഒന്നാംവര്‍ഷ ബി.ഡി.എസ് വിദ്യാര്‍ത്ഥിയായ നെടുമങ്ങാട് സ്വദേശി നിതിന്‍ രാജ് കോളേജ് കെട്ടിടത്തില്‍ നിന്ന് വീണ് മരിച്ചതോടെയാണ് സംഭവം വിവാദമായത്. സംഭവത്തില്‍ വകുപ്പ് മേധാവിക്കെതിരെ ഗുരുതര ആരോപണങ്ങളുമായി കുടുംബം രംഗത്തെത്തി. വകുപ്പ് മേധാവിയുടെ മാനസിക പീഡനമാണ് മകന്റെ മരണത്തിന് കാരണമെന്നാണ് കുടുംബത്തിന്റെ ആരോപണം. ജാതിയുടെയും നിറത്തിന്റെയും പേരില്‍ അധിക്ഷേപം ഉണ്ടായിരുന്നുവെന്നും, ഇന്റേണല്‍ മാര്‍ക്കുമായി ബന്ധപ്പെട്ട് സമ്മര്‍ദ്ദം ചെലുത്തിയിരുന്നുവെന്നും നിതിന്റെ പിതാവ് രാജന്‍ ആരോപിച്ചു.

സീനിയര്‍ വിദ്യാര്‍ത്ഥികളുടെ ഭാഗത്തുനിന്ന് റാഗിങ്ങ് ഉണ്ടായിരുന്നു വെന്നും പരാതിയുണ്ട്. കോളേജില്‍ ചേര്‍ന്നതു മുതല്‍ തന്നെ നിതിന്‍ പ്രശ്നങ്ങള്‍ നേരിട്ടിരുന്നുവെന്നാണ് കുടുംബം പറയുന്നത്. സംഭവത്തിന് മുമ്പ് വീട്ടിലേക്ക് വിളിച്ച് പണം ആവശ്യപ്പെട്ടിരുന്ന നിതിന്‍, പിന്നീട് ബന്ധപ്പെടാനാവാതിരുന്നതായും ഉച്ചയോടെ കോളേജില്‍ നിന്ന് അപകട വിവരം അറിയിച്ചതായും കുടുംബം വ്യക്തമാക്കി. മകന്റെ മരണവിവരം അധികൃതര്‍ നേരിട്ട് അറിയിച്ചില്ലെന്നും ബന്ധുക്കള്‍ ആരോപിച്ചു.

സംഭവത്തില്‍ കോളേജ് അധികൃതര്‍ ആഭ്യന്തര അന്വേഷണം ആരംഭിച്ചിട്ടുണ്ട്. സംഭവത്തിന്റെ യഥാര്‍ത്ഥ കാരണം കണ്ടെത്തുന്നതിനുള്ള നടപടികള്‍ തുടരുകയാണ്.