ഓപ്പറേഷന്‍ ഡി-ഹണ്ട്: 26 പേർ അറസ്റ്റിൽ; മയക്കുമരുന്ന് പിടികൂടി

തിരുവനന്തപുരം: സംസ്ഥാന വ്യാപകമായി നടത്തിയ ‘ഓപ്പറേഷന്‍ ഡി-ഹണ്ട്’ സ്പെഷ്യല്‍ ഡ്രൈവില്‍ 26 പേരെ പോലീസ് അറസ്റ്റ് ചെയ്തു. മയക്കുമരുന്ന് വില്‍പ്പനയില്‍ ഏര്‍പ്പെടുന്നതായി സംശയിക്കുന്ന 1220 പേരെ പരിശോധനയ്ക്ക് വിധേയമാക്കിയതായി അധികൃതര്‍ അറിയിച്ചു. ഏപ്രില്‍ 16-ന് നടത്തിയ പരിശോധനയില്‍ നിരോധിത മയക്കുമരുന്ന് കൈവശം വച്ചതിന് 23 കേസുകള്‍ രജിസ്റ്റര്‍ ചെയ്തു. പിടിയിലായവരില്‍ നിന്ന് എം.ഡി.എം.എ (0.00057 കിലോഗ്രാം), കഞ്ചാവ് (0.05 കിലോഗ്രാം), കഞ്ചാവ് ബീഡി (13 എണ്ണം) എന്നിവ പിടിച്ചെടുത്തു.

സംസ്ഥാനത്ത് നിരോധിത മയക്കുമരുന്നുകളുടെ സംഭരണവും വിപണനവും തടയുന്നതിനായി കര്‍ശന നടപടി സ്വീകരിക്കുന്നതിന്റെ ഭാഗമായാണ് ഡി-ഹണ്ട് നടത്തിയത്. ക്രമസമാധാന വിഭാഗം എ.ഡി.ജി.പി യുടെ നേരിട്ടുള്ള മേല്‍നോട്ടത്തില്‍ ആന്‍റി നര്‍ക്കോട്ടിക്സ് ഇന്‍റലിജന്‍സ് സെല്ലും എന്‍.ഡി.പി.എസ് കോര്‍ഡിനേഷന്‍ സെല്ലും ഉള്‍പ്പെടെ വിവിധ സംവിധാനങ്ങള്‍ പ്രവര്‍ത്തിച്ചുവരുന്നു. മയക്കുമരുന്ന് സംബന്ധിച്ച വിവരങ്ങള്‍ പൊതുജനങ്ങളില്‍ നിന്ന് സ്വീകരിക്കാന്‍ 24 മണിക്കൂറും പ്രവര്‍ത്തിക്കുന്ന ആന്‍റി നര്‍ക്കോട്ടിക് കണ്‍ട്രോള്‍ റൂം (9497927797) സജ്ജമാണ്. വിവരം നല്‍കുന്നവരുടെ വിവരങ്ങള്‍ രഹസ്യമായി സൂക്ഷിക്കുമെന്ന് അധികൃതര്‍ അറിയിച്ചു.