മലപ്പുറം: മലപ്പുറം നഗരസഭയില്‍ പി കെ കുഞ്ഞാലിക്കുട്ടിക്ക് ശേഷം ഏറ്റവും പ്രായം കുറഞ്ഞ ചെയര്‍മാനാകാനൊരുങ്ങി മുജീബ് കാടേരി. മുസ്ലീം ലീഗ് ചെയര്‍മാന്‍ സ്ഥാനാര്‍ഥിയായി ഉയര്‍ത്തികാട്ടി മത്സരിച്ച യൂത്ത് ലീഗ് സംസ്ഥാന സെക്രട്ടറി കൂടിയായ മുജീബ് മലപ്പുറം നഗരസഭയിലെ 30-ാം വാര്‍ഡ് ആലത്തൂര്‍പടിയില്‍ നിന്നും 440 വോട്ടിനു വിജയിച്ചു.
മലപ്പുറം ജില്ലയിലെ മേല്‍മുറി ആലത്തൂര്‍പടി സ്വദേശിയാണ്. വിദ്യാര്‍ഥി പ്രസ്ഥാനത്തിലൂടെ പൊതുരംഗത്ത് വന്ന് 2000-2001 വര്‍ഷത്തില്‍ മലപ്പുറം ഗവ. കോളേജില്‍ നിന്നും യൂണിയന്‍ ചെയര്‍മാനായി പൊതുപ്രവര്‍ത്തന രംഗത്ത് സജീവമായി. മലപ്പുറം ഗവ. കോളേജില്‍ നിന്നും ഡിഗ്രി പൂര്‍ത്തിയാക്കിയ മുജീബ് കേരളത്തിലെ പ്രശസ്തമായ കൊല്ലം ടികെഎം എഞ്ചിനിയറിംഗ് കോളേജില്‍ നിന്നും എംബിഎ ബിരുദം പൂര്‍ത്തിയാക്കി. 16 വര്‍ഷത്തോളമായി ഐടി സോഫ്റ്റ് വെയര്‍ കമ്പനിയുടെ മാനേജിംഗ് ഡയറക്ടര്‍ ആയി പ്രവര്‍ത്തിച്ചു വരുന്നു. യുവജന രാഷ്ട്രീയ പ്രവര്‍ത്തന രംഗത്ത് മലപ്പുറം നിയോജക മണ്ഡലം ജോയിന്റ് സെക്രട്ടറി, ജനറല്‍ സെക്രട്ടറി, പ്രസിഡന്റ്, മലപ്പുറം ജില്ലാ ജനറല്‍ സെക്രട്ടറി തുടങ്ങിയ പദവികള്‍ വഹിച്ച് നിലവില്‍ യൂത്ത് ലീഗിന്റെ സംസ്ഥാന സെക്രട്ടറിയായി പ്രവര്‍ത്തനം തുടരുന്നു.
പാരമ്പര്യമായി തന്നെ പൊതുപ്രവര്‍ത്തന രംഗത്ത് സജീവമായ കുടുംബപശ്ചാത്തലത്തിലാണ് മുജീബിന്റെ ജനനം. പിതാവ് മലപ്പുറം മുനിസിപ്പല്‍ വൈസ് ചെയര്‍മാനായിരുന്ന കാടേരി അബ്ദുല്‍ അസീസും, മാതാവ് മുസ്ലീം ലീഗ് ദേശീയ ഓര്‍ഗനൈസിംഗ് സെക്രട്ടറി ഇ ടി മുഹമ്മദ് ബഷീര്‍ എംപി യുടെ സഹോദരി പരേതയായ ഇ ടി സഫിയയുമാണ്.
സ്‌കൂള്‍ – കോളേജ് പഠന കാലത്ത് പ്രസംഗ, പ്രബന്ധ മത്സരങ്ങളില്‍ സംസ്ഥാനതലത്തില്‍ നടന്ന നിരവധി മത്സരങ്ങളില്‍ ജേതാവായിരുന്നു. കാലിക്കറ്റ് സര്‍വകലാശാല ഇൻ്റർസോണ്‍ കലോത്സവത്തില്‍ പ്രസംഗ മത്സരത്തില്‍ വിജയിയായത് ഉള്‍പ്പെടെ നിരവധി മത്സരങ്ങളില്‍ ജേതാവായിട്ടുണ്ട്. മുസ്ലീം ലീഗ് രാഷ്ട്രീയത്തിലെ യുവജന നേതാക്കള്‍ക്കിടയില്‍ മികച്ച പ്രഭാഷകനെന്നും പ്രഗത്ഭനായ സംഘാടകനെന്ന പേരിലും അറിയപ്പെടുന്നു.
പൊതുതെരഞ്ഞെടുപ്പ് രംഗങ്ങളില്‍ സമീപകാലത്ത് നടന്ന പ്രധാനപ്പെട്ട പല തെരഞ്ഞെടുപ്പുകളുടെയും ചുമതല പാര്‍ട്ടി ഏല്‍പ്പിക്കാറുള്ളത് മുജീബിനെയാണ്. മുസ്ലീം ലീഗ് ദേശീയ പ്രസിഡൻ്റായിരുന്ന ഇ അഹമ്മദിന്റെ അവസാനത്തെ രണ്ട് പാര്‍ലമെൻ്റ് തെരഞ്ഞെടുപ്പുകളുടെയും ക്യാമ്പയിന്‍ കോ. ഓര്‍ഡിനേറ്ററായും അദ്ദേഹത്തിൻ്റെ മരണ ശേഷം നടന്ന മലപ്പുറം ലോകസഭാ ഉപതെരഞ്ഞെടുപ്പില്‍ മുസ്ലീം ലീഗ് ദേശീയ ജനറല്‍ സെക്രട്ടറി പി കെ. കുഞ്ഞാലിക്കുട്ടിയുടെ ക്യാമ്പയിന്‍ കോ. ഓര്‍ഡിനേറ്റര്‍ ആയും അവസാനം നടന്ന ലോകസഭാ തെരഞ്ഞെടുപ്പില്‍ പൊന്നാനി പാര്‍ലമെന്റ് സ്ഥാനാര്‍ഥിയായിരുന്ന മുസ്ലീം ലീഗ് ദേശീയ ഓര്‍ഗനൈസിംഗ് സെക്രട്ടറി ഇ ടി മുഹമ്മദ് ബഷീറിന്റെയും ക്യാമ്പയിന്റെയും ചുമതല വഹിച്ച മുജീബ് ഈ മേഖലയില്‍ പ്രൊഫഷണല്‍ സമീപനത്തോട് കൂടി മികവ് കാണിച്ച സംഘാടകനായി അറിയപ്പെടുന്നു.
- വർക്കല ചെമ്മരുതിയിൽ ഭർത്താവ് ഭാര്യയെ കുത്തിക്കൊലപ്പെടുത്തി; ഭർത്താവ് പോലീസ് കസ്റ്റഡിയിൽ
- വർക്കലയിൽ പോക്സോ നിയമപ്രകാരം 18 കാരൻ അറസ്റ്റിൽ
- വർക്കലയിൽ പുനർവിവാഹം കഴിഞ്ഞ് പത്താം ദിവസം യുവതി മരിച്ച നിലയിൽ
- വർക്കലയിൽ പോക്സോ കേസിൽ പ്രതിക്ക് 95 വർഷം കഠിനതടവും 2.75 ലക്ഷം രൂപ പിഴയും
- അഖിലേന്ത്യാ ട്രേഡ് ടെസ്റ്റിൽ ആറ്റിങ്ങൽ ഗവ. ഐ.ടി.ഐക്ക് മികച്ച നേട്ടം; 15 ട്രെയിനികൾക്ക് ദേശീയ, സംസ്ഥാനതല അംഗീകാരം
- എച്ച്.പി. ഷാജി ഫൗണ്ടേഷൻ്റെ രാഷ്ട്രീയ യുവപ്രതിഭാ പുരസ്‌കാരം സെയ്ദലിക്ക്
