33 ലക്ഷം രൂപ ചെലവിൽ വലിയകുന്ന് താലൂക്ക് ആശുപത്രിയിലെ പുരുഷ വാർഡ് നവീകരിച്ചു

ആറ്റിങ്ങൽ: വലിയകുന്ന് താലൂക്ക് ആശുപത്രിയിൽ നഗരസഭയുടെ പ്ലാൻ ഫണ്ടിൽ നിന്ന് 33 ലക്ഷം രൂപ ചെലവഴിച്ച് നവീകരിച്ച 28 കിടക്കകളുള്ള പുരുഷ കിടപ്പുരോഗികളുടെ വാർഡ് നഗരസഭ ചെയർപേഴ്സൺ എം. പ്രദീപ് ഉദ്ഘാടനം ചെയ്തു.

ചടങ്ങിൽ വൈസ് ചെയർപേഴ്സൺ ആർ. എസ്. രേഖ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺമാരായ അഡ്വ. സുരേഷ് വി. എസ്., അഡ്വ. എ. എം. താഹ, ജി. എസ്. ബിനു, പ്രിയാസാബു, കൗൺസിലർമാരായ ആർ. രാജു, എം. താഹിർ, കെ. സതി, ആശുപത്രി സൂപ്രണ്ട് പ്രീതാ സോമൻ എന്നിവർ സംസാരിച്ചു.

ആശുപത്രിയിലെ അറ്റകുറ്റപ്പണികൾ പൂർത്തിയാക്കി ഓപ്പറേഷൻ തിയേറ്റർ ഈ മാസം തന്നെ പ്രവർത്തനസജ്ജമാക്കുമെന്ന് ഉദ്ഘാടനച്ചടങ്ങിൽ ചെയർപേഴ്സൺ എം. പ്രദീപ് അറിയിച്ചു. പുതിയ അത്യാഹിത വിഭാഗം പ്രവർത്തനം ആരംഭിക്കുന്നതിനായി നഗരസഭാ ഫണ്ടുപയോഗിച്ചുള്ള നിർമാണപ്രവർത്തനങ്ങൾ ആരംഭിച്ചിട്ടുണ്ടെന്നും അടുത്ത മാസം അത് പൊതുജനങ്ങൾക്കായി തുറന്നുകൊടുക്കുമെന്നും അദ്ദേഹം പറഞ്ഞു.

ടേക്ക് എ ബ്രേക്ക് സൗകര്യം, ചുറ്റുമതിൽ, മോർച്ചറി എന്നിവയുടെ അവസാനഘട്ട നിർമാണ പ്രവർത്തനങ്ങളും ഉടൻ ആരംഭിക്കുമെന്ന് ചെയർപേഴ്സൺ അറിയിച്ചു. ആശുപത്രിയിലെ അടിസ്ഥാന സൗകര്യങ്ങൾ കൂടുതൽ മെച്ചപ്പെടുത്തുന്നതിനുള്ള വികസന പ്രവർത്തനങ്ങൾ തുടരുമെന്നും അദ്ദേഹം കൂട്ടിച്ചേർത്തു.