വിരമിച്ചിട്ടും വാഹനത്തിൽ ഔദ്യോഗിക ചിഹ്നം; ടോമിൻ ജെ. തച്ചങ്കരിക്കെതിരെ അന്വേഷണം

കോട്ടയം: വിരമിച്ച മുതിർന്ന പൊലീസ് ഉദ്യോഗസ്ഥൻ ടോമിൻ ജെ. തച്ചങ്കരിക്കെതിരെ അന്വേഷണത്തിന് നിർദേശം നൽകി ഡിജിപി റവാഡ ചന്ദ്രശേഖർ. സേവനത്തിൽ നിന്ന് വിരമിച്ചിട്ടും സ്വകാര്യ വാഹനത്തിൽ ഔദ്യോഗിക പദവിയെ സൂചിപ്പിക്കുന്ന നക്ഷത്ര ചിഹ്നം ഉപയോഗിച്ചതുമായി ബന്ധപ്പെട്ടാണ് നടപടി.
അഭിഭാഷകനായ കൊളത്തൂർ ജയ് സിംഗ് നൽകിയ പരാതി കോട്ടയം ജില്ലാ പൊലീസ് മേധാവിക്ക് കൈമാറിയിട്ടുണ്ട്. കൂടാതെ, കോഴിക്കോട് ചെറുവാടി സ്വദേശി സി.ടി. മുനീർ മുക്കം പൊലീസിൽ സമാനപരാതിയും നൽകിയിട്ടുണ്ട്.

കഴിഞ്ഞ ദിവസം കോട്ടയം കോടതിയിൽ ഹാജരാകാൻ എത്തിയപ്പോൾ ടോമിൻ ജെ. തച്ചങ്കരി സ്വകാര്യ വാഹനത്തിൽ മൂന്ന് നക്ഷത്രങ്ങളുള്ള ഔദ്യോഗിക ചിഹ്നം പതിപ്പിച്ചിരുന്നതായി കണ്ടെത്തി. മാധ്യമപ്രവർത്തകർ ദൃശ്യങ്ങൾ പകർത്താൻ ശ്രമിച്ചതിനെ തുടർന്ന് ചിഹ്നം പിന്നീട് നീക്കം ചെയ്തതായും റിപ്പോർട്ടുണ്ട്. വിരമിച്ച് മൂന്ന് വർഷം പിന്നിട്ടിട്ടും ഇത്തരത്തിൽ ഔദ്യോഗിക ചിഹ്നം ഉപയോഗിച്ച് വിവിധ സ്ഥലങ്ങളിൽ സഞ്ചരിച്ചിരുന്നുവെന്നാരോപണം ഉയർന്നിട്ടുണ്ട്. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.