സ്വാതന്ത്ര്യ ദിനാഘോഷം: നഗരവാസികൾക്ക് സംഗീത വിരുന്നൊരുക്കി വ്യോമസേനാ ബാൻഡ്

തിരുവനന്തപുരം: 80-ാമത് സ്വാതന്ത്ര്യദിനാഘോഷങ്ങളുടെ ഭാഗമായി ഇന്ത്യൻ വ്യോമസേനാ ബാൻഡ് കനകക്കുന്ന് നിശാഗന്ധി ഓഡിറ്റോറിയത്തിൽ ഒരുക്കിയ സംഗീത വിരുന്ന് നഗരവാസികൾക്ക് വേറിട്ട അനുഭവമായി. കൃത്യതയും ഈണവും ദേശസ്നേഹവും സമന്വയിപ്പിച്ച സംഗീതാവതരണം ആസ്വദിക്കാൻ വൻ ജനാവലിയാണ് കനകക്കുന്നിലെത്തിയത്.
ചടങ്ങിൽ മുഖ്യാതിഥിയായി കേരള മുഖ്യമന്ത്രി വി.ഡി. സതീശൻ പങ്കെടുത്തു.

ദക്ഷിണ വ്യോമസേനാ മേധാവി എയർ മാർഷൽ ജസ്‌വീർ സിംഗ് മാൻ മുഖ്യമന്ത്രിയെ സ്വീകരിച്ചു. വ്യോമസേനയിലെയും മറ്റ് സേനാ വിഭാഗങ്ങളിലെയും മുതിർന്ന ഉദ്യോഗസ്ഥർ, സർക്കാർ പ്രതിനിധികൾ, വിമുക്തഭടന്മാർ തുടങ്ങിയവരും ചടങ്ങിൽ പങ്കെടുത്തു.

രാജ്യത്തിന്റെ സ്വാതന്ത്ര്യസമര സേനാനികളുടെ ത്യാഗങ്ങൾക്കും രാജ്യത്തിന്റെ പരമാധികാരം, ഐക്യം, പ്രദേശിക സമഗ്രത എന്നിവ സംരക്ഷിക്കുന്നതിൽ സായുധസേന കാഴ്ചവയ്ക്കുന്ന ധീരതയ്ക്കും അചഞ്ചലമായ പ്രതിബദ്ധതയ്ക്കും ആദരമർപ്പിച്ചായിരുന്നു സംഗീത വിരുന്ന്.

നിശാഗന്ധിയിലെ നിറഞ്ഞ സദസ്സിന് മുന്നിൽ ബാൻഡ് മാസ്റ്റർ ജെ.ഡബ്ല്യു.ഒ. ജോസ് മാത്യു ക്ലീറ്റസിന്റെ നേതൃത്വത്തിൽ 24 സംഗീതജ്ഞർ ഉൾപ്പെട്ട എയർഫോഴ്സ് ബാൻഡാണ് പരിപാടി അവതരിപ്പിച്ചത്. മാ തുജേ സലാം, ദിൽ സേ റേ, വന്ദേ മാതരം തുടങ്ങിയ ഗാനങ്ങൾ കാണികളുടെ കൈയടി നേടി.

ഈ വർഷത്തെ സ്വാതന്ത്ര്യദിനാഘോഷങ്ങൾക്ക് കൂടുതൽ ആവേശവും നിറവും പകർന്ന അവിസ്മരണീയ സംഗീതസന്ധ്യയായിരുന്നു വ്യോമസേനാ ബാൻഡിന്റെ പ്രകടനം.