വർക്കലയിൽ ഇരുചക്രവാഹനമിടിച്ച് ചികിത്സയിലിരുന്ന വയോധികൻ മരിച്ചു

വർക്കല: വർക്കലയിൽ ഇരുചക്രവാഹനമിടിച്ച് ഗുരുതരമായി പരിക്കേറ്റ് ചികിത്സയിലായിരുന്ന വയോധികൻ മരിച്ചു. വർക്കല മൈതാനം പ്ലാവിള വീട്ടിൽ പ്രകാശ് (60) ആണ് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ ബുധനാഴ്ച ഉച്ചയോടെ മരിച്ചത്.

കഴിഞ്ഞ 27ന് പുലർച്ചെ 5 മണിയോടെയായിരുന്നു അപകടം. മൈതാനം ഭാഗത്തുനിന്ന് റെയിൽവേ സ്റ്റേഷനിലേക്ക് നടന്നുപോകുകയായിരുന്ന പ്രകാശിനെ അതേ ദിശയിൽ എത്തിയ ഇരുചക്രവാഹനം ഇടിച്ചുതെറിപ്പിക്കുകയായിരുന്നു. അപകടത്തിൽ കാൽനടയാത്രക്കാരനായ പ്രകാശിനും ബൈക്കിലുണ്ടായിരുന്ന ഇടവാ സ്വദേശികളായ യുവാക്കൾക്കും പരിക്കേറ്റു.

ഗുരുതരമായി പരിക്കേറ്റ പ്രകാശിനെ പോലീസ് വർക്കല താലൂക്ക് ആശുപത്രിയിൽ പ്രവേശിപ്പിച്ചു. അവിടെ പ്രാഥമിക ചികിത്സ നൽകിയ ശേഷം പാരിപ്പള്ളി മെഡിക്കൽ കോളേജ് ആശുപത്രിയിലേക്കും തുടർന്ന് വിദഗ്ധ ചികിത്സയ്ക്കായി തിരുവനന്തപുരം മെഡിക്കൽ കോളേജ് ആശുപത്രിയിലേക്കും മാറ്റി. എന്നാൽ ചികിത്സയിലിരിക്കെ മരണം സംഭവിക്കുകയായിരുന്നു.
ബൈക്കിൽ സഞ്ചരിച്ചിരുന്ന ഇടവാ സ്വദേശികളായ മുഹമ്മദ് റാഫി (34), ദിയാദ് (33), ഷാരോൺ അമീൻ (35) എന്നിവർ വർക്കലയിലെ സ്വകാര്യ ആശുപത്രിയിൽ ചികിത്സയിൽ തുടരുകയാണ്.