ഡിആർഡിഒയുടെ തദ്ദേശീയ ‘നേത്ര’ എഇഡബ്ല്യു&സി സംവിധാനത്തിന് അന്തിമ പ്രവർത്തനാനുമതി; വ്യോമനിരീക്ഷണ ശേഷിയിൽ ഇന്ത്യക്ക് വൻ കരുത്ത്

ന്യൂഡെൽഹി/ബെംഗളൂരു: ഇന്ത്യയുടെ തദ്ദേശീയ പ്രതിരോധ സാങ്കേതികവിദ്യ വികസനത്തിന് നിർണായക നേട്ടമായി, പ്രതിരോധ ഗവേഷണ വികസന സംഘടന (DRDO) വികസിപ്പിച്ച ‘നേത്ര’ എയർബോൺ എർളി വാർണിംഗ് ആൻഡ് കൺട്രോൾ (AEW&C) സംവിധാനത്തിന് ഇന്ത്യൻ വ്യോമസേന (IAF) അന്തിമ പ്രവർത്തനാനുമതി (Final Operational Clearance – FOC) ലഭിച്ചു.

ബെംഗളൂരുവിൽ നടന്ന ചടങ്ങിൽ ഇന്ത്യൻ വ്യോമസേന ഡെപ്യൂട്ടി ചീഫ് എയർ മാർഷൽ അവധേഷ് കുമാർ ഭാരതി മുഖ്യാതിഥിയായി പങ്കെടുത്തു. മുൻ വ്യോമസേന മേധാവി എയർ ചീഫ് മാർഷൽ ആർ.കെ.എസ്. ഭദൗരിയ, ഡിആർഡിഒ മുൻ ചെയർമാൻ ഡോ. എസ്. ക്രിസ്റ്റഫർ എന്നിവർ വിശിഷ്ടാതിഥികളായിരുന്നു. നിലവിലെയും വിരമിച്ചവരുമായ വ്യോമസേന ഉദ്യോഗസ്ഥർ, ഡിആർഡിഒ ശാസ്ത്രജ്ഞർ, ഇന്ത്യൻ പ്രതിരോധ വ്യവസായ സ്ഥാപനങ്ങളുടെ പ്രതിനിധികൾ തുടങ്ങിയവരും ചടങ്ങിൽ പങ്കെടുത്തു.

ഇന്ത്യൻ വ്യോമസേനയും ഡിആർഡിഒയും പ്രതിരോധ മേഖലയിലെ ഇന്ത്യൻ വ്യവസായ സ്ഥാപനങ്ങളും ചേർന്ന് വികസിപ്പിച്ച ‘നേത്ര’ സംവിധാനം രാജ്യത്തിന്റെ വ്യോമനിരീക്ഷണം, യുദ്ധസാഹചര്യ അവബോധം (Situational Awareness), യുദ്ധനിയന്ത്രണം (Battle Management) എന്നിവ കൂടുതൽ ശക്തിപ്പെടുത്തുമെന്ന് ഡിആർഡിഒ അറിയിച്ചു.

ചടങ്ങിൽ സംസാരിച്ച എയർ മാർഷൽ അവധേഷ് കുമാർ ഭാരതി, ബാലാക്കോട്ട് വ്യോമാക്രമണത്തിലും ‘ഓപ്പറേഷൻ സിന്ദൂർ’ ദൗത്യത്തിലും ‘നേത്ര’ സംവിധാനം മികച്ച പ്രവർത്തനക്ഷമതയും വിശ്വാസ്യതയും തെളിയിച്ചതായി പറഞ്ഞു. യുദ്ധസാഹചര്യങ്ങൾ ക്കനുസരിച്ച് തദ്ദേശീയമായി വികസിപ്പിച്ച സംവിധാനങ്ങളിൽ ആവശ്യമായ മാറ്റങ്ങൾ വേഗത്തിൽ വരുത്താൻ കഴിയുന്നതാണ് ഇതിന്റെ പ്രധാന നേട്ടമെന്നും അദ്ദേഹം ചൂണ്ടിക്കാട്ടി.

ഡിആർഡിഒയുടെ എയറോനോട്ടിക്സ് ക്ലസ്റ്റർ ഡയറക്ടർ ജനറൽ ഡോ. കെ. രാജലക്ഷ്മി മേനോൻ ‘നേത്ര’ പദ്ധതിയുടെ തുടക്കം മുതൽ പ്രവർത്തനസജ്ജമാകുന്നതുവരെയുള്ള വികസനയാത്ര വിശദീകരിച്ചു. വിവിധ വെല്ലുവിളികൾ അതിജീവിച്ചാണ് പദ്ധതി വിജയകരമായി പൂർത്തിയാക്കിയതെന്നും അവർ പറഞ്ഞു.

ഇലക്ട്രോണിക്സ് ക്ലസ്റ്റർ ഡയറക്ടർ ജനറൽ ഡോ. ബി.കെ. ദാസ്, ഡിആർഡിഒ ലാബുകൾ, ഇന്ത്യൻ വ്യവസായ സ്ഥാപനങ്ങൾ, സർട്ടിഫിക്കേഷൻ ഏജൻസികൾ, ഇന്ത്യൻ വ്യോമസേന എന്നിവയുടെ കൂട്ടായ പ്രവർത്തനമാണ് പദ്ധതിയുടെ വിജയത്തിന് അടിത്തറയിട്ടതെന്ന് വ്യക്തമാക്കി.ചടങ്ങിൽ ‘നേത്ര’ പദ്ധതിയുടെ വിജയത്തിന് നിർണായക സംഭാവന നൽകിയ വിവിധ സ്ഥാപനങ്ങളെയും സംഘങ്ങളെയും ആദരിച്ചു. തദ്ദേശീയ സാങ്കേതികവിദ്യ, നവീകരണം, പ്രതിരോധ സ്വയംപര്യാപ്തത എന്നിവയിൽ ഇന്ത്യ കൈവരിച്ച സുപ്രധാന നേട്ടത്തിന്റെ പ്രതീകമാണ് ‘നേത്ര’ എഇഡബ്ല്യു&സി സംവിധാനത്തിന്റെ അന്തിമ പ്രവർത്തനാനുമതിയെന്ന് ഡിആർഡിഒ വ്യക്തമാക്കി. ഇതോടെ ഇന്ത്യയുടെ വ്യോമനിരീക്ഷണ, കമാൻഡ് ആൻഡ് കൺട്രോൾ ശേഷികൾ കൂടുതൽ ശക്തിപ്പെടുമെന്നാണ് വിലയിരുത്തൽ.