ആറ്റിങ്ങലിൽ കാർ നിയന്ത്രണം വിട്ട് വൈദ്യുത പോസ്റ്റിലിടിച്ച് തലകീഴായി മറിഞ്ഞു; ആളപായമില്ല

ആറ്റിങ്ങൽ: ആറ്റിങ്ങലിൽ നിയന്ത്രണം വിട്ട കാർ വൈദ്യുത പോസ്റ്റിലിടിച്ച് തലകീഴായി മറിഞ്ഞ അപകടത്തിൽ ആളപായമില്ല. തിങ്കളാഴ്ച രാത്രി 8.45 ഓടെയായിരുന്നു സംഭവം.

അമിതവേഗത്തിൽ എത്തിയ മാരുതി ആൾട്ടോ കാർ നിയന്ത്രണം വിട്ട് റോഡരികിലെ വൈദ്യുത പോസ്റ്റിലിടിച്ചാണ് അപകടമുണ്ടായത്. ഇടിയുടെ ആഘാതത്തിൽ പോസ്റ്റിന്റെ താഴ്ഭാഗം ഒടിഞ്ഞ് തകർന്നതിനെ തുടർന്ന് കാർ തലകീഴായി മറിയുകയായിരുന്നു.

വാഹനത്തിലുണ്ടായിരുന്ന ആറ്റിങ്ങൽ കരിച്ചിയിൽ സ്വദേശികളായ ജയകൃഷ്ണനും അജിയും നിസ്സാര പരിക്കുകളോടെ രക്ഷപ്പെട്ടു. അപകടത്തിന് പിന്നാലെ ഇവരെ വാഹനത്തിൽ നിന്ന് പുറത്തെടുത്തപ്പോൾ ഇരുവരും മദ്യലഹരിയിലായിരുന്നുവെന്ന് പ്രദേശവാസികൾ പറഞ്ഞു.

വിവരമറിഞ്ഞ് ആറ്റിങ്ങൽ പൊലീസ് സ്ഥലത്തെത്തി ഇരുവരെയും കസ്റ്റഡിയിലെടുത്ത് അന്വേഷണം ആരംഭിച്ചു. അപകടത്തിൽ വൈദ്യുത പോസ്റ്റ് തകർന്നതിനാൽ കെഎസ്ഇബി ഉദ്യോഗസ്ഥരും സ്ഥലത്തെത്തി വൈദ്യുതി ബന്ധം സുരക്ഷിതമാക്കുന്നതിനും പോസ്റ്റ് മാറ്റിസ്ഥാപിക്കുന്നതിനുമായി തുടർനടപടികൾ സ്വീകരിച്ചു.