ചിറയിൻകീഴ് കൊലപാതകത്തിൽ പ്രതിയുടെ അറസ്റ്റും റിമാൻഡും അതീവ രഹസ്യമായി നടത്തി

യുവാവിനെ കുത്തിക്കൊലപ്പെടുത്തിയ സംഭവത്തിൽ ദൃക്സാക്ഷി പോലീസിനു മൊഴി നൽകി.

ചിറയിൻകീഴ്: വിഷ്ണുപ്രകാശിന്റെ കൊലപാതകത്തിലെ കൂട്ടു പ്രതിയായ ചിറയിൻകീഴ് സ്വദേശിയായ ആറായിരം എന്ന് വിളിക്കുന്ന ജിജു (42) വിനെയാണ് പോലീസ് അതീവ രഹസ്യമായി കസ്റ്റഡിയിലെടുത്തത്. തുടർന്നുള്ള അറസ്റ്റ് നടപടിക്രമങ്ങളെല്ലാം പൂർത്തിയാക്കി ശനിയാഴ്ച രാത്രി എട്ടു മണിയോടെ വർക്കല കോടതിയിൽ ഹാജരാക്കുകയായിരുന്നു . പ്രതിയെ കോടതി റിമാൻഡ് ചെയ്തു.

കേസിലെ ഒന്നാം പ്രതിയായ ആട്ടോ ജയൻ ഇപ്പോഴും ഒളിവിലാണ് ഇയാൾക്ക് വേണ്ടിയുള്ള അന്വേഷണം ചിറയിൻകീഴ് പോലീസ് ഊർജ്ജിതപ്പെടുത്തി. സ്ഥിരം കുറ്റവാളിയായ ഇയാൾ കുറ്റകൃത്യങ്ങൾക്ക് ശേഷം ജില്ല വിട്ടു പോകുന്നത് അപൂർവമാണ് . സമീപപ്രദേശങ്ങളിൽ തന്നെ അതിവിദഗ്ധമായി ഒളിവിൽ കഴിയുകയാണ് പതിവ് രീതി. അതുകൊണ്ടുതന്നെ പോലീസ് പ്രത്യേക സംഘങ്ങളായി വ്യാപകമായി തിരച്ചിൽ നടത്തുകയാണ്.

കടയ്ക്കാവൂർ തേവരുനട സ്വദേശിയായ തുണ്ടതിൽ വീട്ടിൽ 26 വയസ്സുള്ള വിഷ്ണുപ്രകാശിനെയാണ് ‘ആണ് കുപ്രസിദ്ധ കൊടുംകുറ്റവാളിയായ ആട്ടോ ജയൻ കുത്തി കൊലപ്പെടുത്തിയത്. വെള്ളിയാഴ്ച വൈകുന്നേരം ആറര മണിയോടെ ആനത്തലവട്ടം ആറ്റിന് സമീപം വച്ചായിരുന്നു സംഭവം.

ആനത്തലവട്ടം ശിവനടയിലെ ആറ്റിനു സമീപം പുഴമീൻ വാങ്ങുന്നതിനായി വൈകുന്നേരം ആറുമണിയോടെ വിഷ്ണുപ്രകാശും സുഹൃത്ത് ആദിത്യനും എത്തിയത്. ആ സമയം അവിടെയുണ്ടായിരുന്ന ഓട്ടോ ജയനും സുഹൃത്ത് ജിജുവും ആയി അസഭ്യം വിളിച്ചതിലുള്ള തർക്കം വാക്കേറ്റവും ഒടുവിൽ കയ്യാങ്കളിയുമായി . തുടർന്ന് രണ്ടാം പ്രതിയായ ജിജു വിഷ്ണുപ്രകാശിന്റെ ഷർട്ടിൽ കയറിപ്പിടിച്ച ശേഷം കയ്യിൽ കരുതിയിരുന്ന കത്തിയെടുത്ത് വീശി കൊന്നുകളയുമെന്ന് ഭീഷണി മുഴക്കി. ഇതിനിടയിൽ ഒന്നാംപ്രതി ആട്ടോ ജയൻ വിഷ്ണുപ്രകാശിൻ്റെ പുറകിലൂടെ പൂണ്ടടക്കം പിടിച്ചുവച്ച് പോക്കറ്റിൽ കരുതിയിരുന്ന കത്തിയെടുത്ത് കഴുത്തിൽ കുത്തി ആഴത്തിൽ മുറിവേൽപ്പിക്കുകയായിരുന്നു.

ഗുരുതരമായി പരിക്കേറ്റ വിഷ്ണുപ്രകാശിനെ തിരുവനന്തപുരം മെഡിക്കൽ കോളേജിൽ എത്തിച്ചെങ്കിലും മരണം സംഭവിച്ചിരുന്നു.

വെൽഡിങ് ജോലിക്ക് സഹായിയായി പോകുന്ന വിഷ്ണുപ്രകാശ് ഈ അടുത്തകാലത്താണ് വിദേശത്തുനിന്നും നാട്ടിലെത്തിയത്. വിഷ്ണുപ്രകാശിനെ ആക്രമിച്ച ശേഷം കൊടും കുറ്റവാളിയായ ആട്ടോ ജയനും , ജിജുവും സ്ഥലത്തു നിന്നും കടന്നു കളയുകയാ യിരുന്നു .

വിഷ്ണുപ്രകാശ് കൊല്ലപ്പെടുന്ന സമയം ഒപ്പമുണ്ടായിരുന്ന സുഹൃത്ത് ആദിത്യൻ സംഭവങ്ങൾക്കെല്ലാം ദൃക്സാക്ഷിയായിരുന്നു. ഇയാൾ പോലീസിന് നൽകിയ മൊഴിയുടെ അടിസ്ഥാനത്തിൽ ചിറയിൻകീഴ് പോലീസ് ഓട്ടോ ജയനെതിരെ കൊലപാതകത്തിന് കേസ് രജിസ്റ്റർ ചെയ്തു അന്വേഷണം ആരംഭിച്ചിരുന്നു.

കൊലപാതകത്തിൽ ഓട്ടോ ജയനോടൊപ്പം ഉണ്ടായിരുന്ന സുഹൃത്തും രണ്ടാം പ്രതിയുമായ

ജിജുവിനെ പോലീസ് ഒളിത്താവളത്തിൽ നിന്നും ശനിയാഴ്ച തന്നെ രഹസ്യമായി കസ്റ്റഡിയിലെടുത്തിരുന്നു.