25-മത് കേരള രാജ്യാന്തര ചലച്ചിത്ര മേള അടുത്ത വര്‍ഷം നടക്കും. 2021 ഫെബ്രുവരി 12 മുതൽ 19 വരെയാണ് മേള നടക്കുന്നതെന്നാണ് ചലച്ചിത്ര അക്കാദമി അറിയിച്ചിരിക്കുന്നത്. ഇപ്പോഴത്തെ കൊവിഡ് പ്രത്യേക സാഹചര്യം കണക്കിലെടുത്താണ് ഡിസംബറിൽ നടക്കേണ്ട ചലച്ചിത്ര മേള അടുത്ത വർഷത്തേക്ക് മാറ്റി വെച്ചിരിക്കുന്നത്.
കൊവിഡ് മാനദണ്ഡങ്ങൾ പാലിച്ചാവും ഫെബ്രുവരിയിൽ ചലച്ചിത്ര മേള നടത്തുന്നതെന്നും അക്കാദമി അറിയിച്ചിട്ടുണ്ട്. ചലച്ചിത്ര മേളയിലേക്കുള്ള എൻട്രികൾ ഐഎഫ്എഫ്കെ വെബ്സൈറ്റ് വഴി ഈ വര്‍ഷം ഒക്ടോബർ 31 വരെ സമർപ്പിക്കാവുന്നതാണ്.
2019 സെപ്തംബർ ഒന്നിനും 2020 ഓഗസ്റ്റ് 31നും ഇടയിൽ പൂർത്തീകരിച്ച ചിത്രങ്ങൾക്കായിരിക്കും മേളയിൽ പങ്കെടുക്കാൻ അവസരം ഉണ്ടായിരിക്കുകയാണ്. എൻട്രികൾ ഒക്ടോബർ 31ന് ഉള്ളിലും പ്രിവ്യൂ മെറ്റീരിയൽ നവംബർ 2ന് മുൻപുമായി അയക്കേണ്ടതാണ്. തെരഞ്ഞെടുക്കപ്പെട്ട സിനിമകളുടെ ചുരുക്ക പട്ടിക ഡിസംബർ 10നായിരിക്കും പ്രസിദ്ധീകരിക്കുന്നത്. സ്ക്രീനിങ്ങിനായുള്ള സ്രീനിങ് മെറ്റീരിയൽ അടുത്ത വര്‍ഷം ജനുവരി 20ന് മുമ്പ് സമര്‍പ്പിക്കേണ്ടതുമാണ് എന്നാണ് അറിയിച്ചിരിക്കുന്നത്.
