ഡിജിറ്റൽ പേയ്‌മെന്റ് രംഗത്തെ അതികായനായ പേടിഎം ആപ്പിനെ പ്ലേസ്റ്റോറിൽ പുറത്താക്കി ഗൂഗിൾ. സ്പോർട്സ് വാതുവെപ്പിന് സൗകര്യമൊരുക്കുന്ന ഓൺലൈൻ ഗെയിമുകൾ കളിക്കാൻ ആപ്ലിക്കേഷൻ ഉപഭോക്താക്കളെ അനുവദിക്കുന്നുവെന്ന് കാരണം ചൂണ്ടിക്കാട്ടിയാണ് ഗൂഗിൾ പ്ലേസ്റ്റോറിൽ നിന്നും പേടിഎം ആപ്പിനെ നീക്കം ചെയ്തിരിക്കുന്നത്.
പേടിഎം ഫസ്റ്റ് ഗെയിംസ് ആപ്പും പ്ലേസ്റ്റോറിൽ നിന്നും ഒഴിവാക്കിയിട്ടുണ്ട്. കൂടാതെ ഗൂഗിൾ ഇന്ത്യ പുത്തൻ ബ്ലോഗ് പോസ്റ്റിൽ ചൂതാട്ട നയങ്ങൾക്കെതിരായ പുതിയ മാർഗ്ഗനിർദ്ദേശങ്ങൾ പോസ്റ്റ് ചെയ്തിട്ടുണ്ട്. ഗൂഗിൾ പ്ലേ സ്റ്റോറിൽ നിന്ന് ഇതാദ്യമായാണ് പേടിഎമ്മിന്റെ പ്രധാന ആപ്ലിക്കേഷൻ നീക്കംചെയ്യുന്നത്. അതെ സമയം പേടിഎമ്മിൽ നിന്നുള്ള വെൽത്ത് മാനേജ്‌മന്റ് ആപ്ലിക്കേഷൻ പേടിഎം മണി, മർച്ചന്റ് അപ്ലിക്കേഷൻ പേടിഎം ഫോർ ബിസിനസ്, സിനിമ ടിക്കറ്റുകൾ ബുക്ക് ചെയ്യാനുള്ള ആപ്ലിക്കേഷൻ, പേടിഎം ഇൻസൈഡർ തുടങ്ങിയ ആപ്പുകൾ പ്ലേസ്റ്റോറിൽ തുടരുന്നുണ്ട്.
മേല്പറഞ്ഞ എല്ലാ അപ്പുകളിൽ ഒന്ന് പോലും അതേസമയം ആപ്പിളിന്റെ ഐഓഎസ് ആപ്പ് സ്റ്റോറിൽ നിന്നും നീക്കം ചെയ്തിട്ടില്ല. “ഞങ്ങൾ ഓൺലൈൻ കാസിനോകളെ അനുവദിക്കുകയോ സ്പോർട്സ് വാതുവെപ്പ് സുഗമമാക്കുന്ന അപ്ലിക്കേഷനുകളെ പിന്തുണയ്ക്കുകയോ ചെയ്യുന്നില്ല. പണമോ, സമ്മാനങ്ങളോ നേടുന്നതിനായി പണമടച്ചുള്ള ടൂർണമെന്റുകളിൽ പങ്കെടുക്കാൻ അനുവദിക്കുന്ന, ഒരു ബാഹ്യ വെബ്‌സൈറ്റിലേക്ക് ഏതെങ്കിലും അപ്ലിക്കേഷൻ ഉപഭോക്താക്കളെ നയിക്കുന്നുവെങ്കിൽ അത് ഞങ്ങളുടെ നയങ്ങളുടെ ലംഘനമാണ്,” ഗൂഗിൾ ബ്ലോഗ് പോസ്റ്റിൽ വ്യക്തമാക്കി.
