നീ ഹിമമഴയായ് വരൂ’, ‘വാതുക്കല് വെള്ളരിപ്രാവ്’ തുടങ്ങിയ പാട്ടുകളിലൂടെ ചുരുങ്ങിയ കാലം കൊണ്ട് ശ്രദ്ധ നേടിയ ഗായികയാണ് നിത്യ മാമ്മൻ. ഇപ്പോഴിതാ കടവ് ഈണങ്ങള്‍ എന്ന ആൽബത്തിലെ സ്നേഹമുള്ള്’ എന്ന പാട്ടിലൂടെ വീണ്ടും ആസ്വാദകരുടെ ഹൃദയം കവർന്നിരിക്കുകയാണ് നിത്യ.
അടുത്തിടെ എ.ആർ. റഹ്മാന്‍റെ ഗൃഹാതുരത്വമുണർത്തുന്ന മെലഡികൾ കോർത്തിണക്കിക്കൊണ്ട് ‘മദ്രാസ് മോസാർട്ടിന്‍റെ ഹൃദയരാഗങ്ങളിലൂടെ ‘ എന്ന പേരിൽ സംഗീത വിരുന്നൊരുക്കിയ മലയാളി വൈദികനും ഓസ്ട്രിയയിലെ വിയന്ന യൂണിവേഴ്‌സിറ്റിയിൽ കോറൽ കണ്ടക്ടിങ്ങിലും പിയാനോയിലും ഗവേഷണം നടത്തുന്നയാളുമായ ഫാ. ജാക്സൺ സേവ്യറാണ് സ്നേഹമുള്ളിന് സംഗീതം നൽകിയിരിക്കുന്നത്.
ശ്രീനി എ മഠത്തിലാണ് വരികളെഴുതിയിരിക്കുന്നത്. സ്നേഹമുള്ളുകൊണ്ടുവന്ന നീ വരച്ച ചിത്രമെന്നിൽ മാഞ്ഞിടാത്ത ജീവബിന്ദുവായ്, ഉള്ളുനൊന്തു നീ പകര്‍ന്ന ജീവനിന്ന് എന്‍റെയുള്ളിൽ അന്നുമിന്നുമെന്നുമൊപ്പമായ്…എന്ന് തുടങ്ങുന്ന വരികളിലൂടെ ആരുടെയെങ്കിലും സ്നേഹം മനസ്സിലാക്കുമ്പോൾ തുടിക്കുന്ന ആത്മാവിനേയും അദൃശ്യമായ നിത്യപ്രേമത്തേയുമൊക്കെയാണ് വരച്ചിട്ടിരിക്കുന്നത്.
എബിൻ പള്ളിച്ചൻ പ്രോഗ്രാമിംഗും ജോസി ആലപ്പുഴ സാക്സോഫോണും നിര്‍വ്വഹിച്ചിരിക്കുന്നതാണ് ആൽബം. സ്റ്റുഡിയോ ഫ്രെഡ്ഡീസ് ഓഡിയോ വീഡിയോ ഗ്യാരേജ്, ജിന്‍റൂസ് ഫോട്ടോഗ്രഫി, മിക്സിംഗ് നിഖിൽ കാക്കോച്ചൻ എന്നിവരാണ്. കുറച്ച് നാളുകള്‍ക്ക് അമേരിക്കയിൽ പോലീസുകാരനാൽ കൊല്ലപ്പെട്ട ജോർജ് ഫ്ലോയിഡിന്‍റെ സ്മരണാർത്ഥം I can’t breathe എന്ന പേരിലുള്ള ഗാനം അവതരിപ്പിച്ചും ഇക്കഴിഞ്ഞ ഓണക്കാലത്ത് ഓണത്തപ്പാ നീ എവിടെ എന്ന പാട്ടൊരുക്കിയും സ്വാതന്ത്ര്യദിനത്തിൽ വിയന്ന സ്വദേശികളുമായി ചേർന്ന് വന്ദേമാതരം ഒരുക്കിയും മറ്റ് മ്യൂസിക്കൽ കൺസേർട്ടുകൾ, സ്ട്രീറ്റ് പെർഫോമൻസുകൾ, പിയാനോ ട്യൂട്ടോറിയൽ, മ്യൂസിക് മോട്ടിവേഷണൽ ടോക്കുകള്‍, ക്രിസ്തീയ ഭക്തിഗാനങ്ങൾ, പിയാനോ കവർ എന്നിവയൊരുക്കിയും ചുരുങ്ങിയ നാളുകള്‍ കൊണ്ട് യൂട്യൂബിൽ ശ്രദ്ധ നേടിയ ഫാ.ജാക്സൺ ചമ്പക്കര സ്വദേശിയാണ്.
