ട്രെയിൻ യാത്രക്കാർക്ക് ഇനി ‘സ്വിഗ്ഗി’ രുചി; സീറ്റിലിരുന്ന് പ്രിയഭക്ഷണം

തിരുവനന്തപുരം: തീവണ്ടി യാത്രയ്ക്കിടെ ഭക്ഷണം വാങ്ങാൻ സ്റ്റേഷനുകളിൽ ഓടിയിറങ്ങേണ്ട സാഹചര്യം ഇനി ഒഴിവാകും. പ്രമുഖ ഓൺലൈൻ ടിക്കറ്റ് ബുക്കിംഗ് പ്ലാറ്റ്‌ഫോമുകളായ ഇക്സിഗോ (ixigo), കൺഫേം ടിക്കറ്റ് (ConfirmTkt) എന്നിവ സ്വിഗ്ഗിയുമായി (Swiggy) കരാറിൽ ഏർപ്പെട്ടതോടെ യാത്രക്കാർക്ക് ട്രെയിനിലെ സീറ്റിലിരുന്ന് തന്നെ ഇഷ്ടഭക്ഷണം ഓർഡർ ചെയ്യാൻ സാധിക്കും.

രാജ്യത്തെ 160-ലധികം സ്റ്റേഷനുകളിൽ പ്രവർത്തിക്കുന്ന 40,000-ത്തിലധികം റെസ്റ്റോറന്റുകളിൽ നിന്നുള്ള വിഭവങ്ങളാണ് ലഭ്യമാകുക. ഇക്സിഗോ അല്ലെങ്കിൽ കൺഫേം ടിക്കറ്റ് ആപ്പുകളിലെ ‘Order Food on Train’ എന്ന ഓപ്ഷൻ വഴി പി.എൻ.ആർ നമ്പർ നൽകി ഭക്ഷണം ബുക്ക് ചെയ്യാം. ട്രെയിൻ എത്തുന്ന പ്രധാന സ്റ്റേഷനുകളിലെ ലഭ്യമായ റെസ്റ്റോറന്റുകളുടെ പട്ടിക ആപ്പിൽ കാണിക്കും. യാത്രയ്ക്ക് നാല് ദിവസം മുമ്പ് മുതൽ സ്റ്റേഷനിലെത്തുന്നതിന് 30 മിനിറ്റ് മുമ്പ് വരെ ഓർഡർ ചെയ്യാൻ കഴിയും. ഓൺലൈൻ പെയ്‌മെന്റ് നടത്തിയാൽ ഭക്ഷണം കൃത്യസമയത്ത് സീറ്റിൽ എത്തിക്കും. ഡെലിവറി നടക്കാത്ത പക്ഷം മുഴുവൻ തുകയും തിരികെ നൽകുമെന്ന് സ്വിഗ്ഗി അറിയിച്ചു.

ട്രെയിൻ യാത്രക്കാർ ഏറ്റവും കൂടുതൽ ഓർഡർ ചെയ്യുന്ന വിഭവമായി ബിരിയാണിയാണ് മുന്നിൽ. വടപാവ്, അപ്പം, ലിറ്റി ചോഖ എന്നീ പ്രാദേശിക വിഭവങ്ങൾക്കും മികച്ച ആവശ്യകതയുണ്ട്. കൂടാതെ മൊത്തം ഓർഡറുകളിൽ 14 ശതമാനം വരെ വീട്ടിലിരിക്കുന്ന ബന്ധുക്കളോ സുഹൃത്തുക്കളോ നൽകുന്നതായും കണക്കുകൾ സൂചിപ്പിക്കുന്നു.

യാത്ര ചെയ്യുന്നവർക്കായി അടുത്ത സ്റ്റേഷനിൽ ചൂടുള്ള ഭക്ഷണം ലഭ്യമാക്കാൻ ഇവർ സ്വിഗ്ഗി ഉപയോഗിക്കുന്നതാണെന്ന് അധികൃതർ പറയുന്നു. യാത്രക്കാർക്ക് ഗുണമേന്മയുള്ള ഭക്ഷണം സമയബന്ധിതമായി ലഭ്യമാക്കുക എന്നതാണ് ലക്ഷ്യമെന്ന് ഇക്സിഗോ സി.ഒ.ഒ ശ്രീപാദ് വൈദ്യ വ്യക്തമാക്കി.

ഇന്ത്യൻ റെയിൽവേ യാത്ര കൂടുതൽ സൗകര്യപ്രദവും ആസ്വാദ്യകരവുമാക്കാൻ ഈ സേവനം സഹായകരമാകുമെന്ന് സ്വിഗ്ഗി വൈസ് പ്രസിഡന്റ് ദീപക് മാലുവും പറഞ്ഞു.