ന്യൂഡൽഹി: ഏപ്രിൽ 27ന് മുമ്പ് രാജ്യം വിടണമെന്ന ഇന്ത്യൻ സർക്കാരിന്റെ നിർദ്ദേശത്തിനു പിന്നാലെ അതിർത്തി കടന്ന് പാകിസ്താൻ പൗരന്മാർ. അട്ടാരി-വാഗ അതിർത്തിയിലൂടെയാണ് ഇന്ത്യയിൽ സന്ദർശനത്തിന് എത്തിയ പാക് പൗരന്മാർ തിരിച്ചു പോകുന്നത്. കശ്മീരിലെ പഹൽഗാമിൽ ചൊവ്വാഴ്ച 26 പേരുടെ മരണത്തിനിടയാക്കിയ ഭീകരാക്രമണത്തിനു പിന്നാലെയാണ് ഇന്ത്യ കർക്കശമായ നിലപാട് സ്വീകരിച്ചത്. പാകിസ്താൻ സൈനിക അറ്റാഷെകളെ പുറത്താക്കൽ, 1960ലെ സിന്ധു നദീജല ഉടമ്പടി താൽക്കാലികമായി നിർത്തിവെക്കൽ, അട്ടാരി കരമാർഗ്ഗ ഗതാഗത പോസ്റ്റ് അടച്ചുപൂട്ടൽ എന്നിവയുൾപ്പെടെ നിരവധി നടപടികൾ കേന്ദ്രം ബുധനാഴ്ച പ്രഖ്യാപിച്ചു. മെഡിക്കൽ വിസയിൽ ഇന്ത്യയിൽ എത്തിയവർക്ക് ഏപ്രിൽ 29 വരെയാണ് തിരിച്ചു പോകാൻ അവസരം നൽകിയിരിക്കുന്നത്. ഇന്ത്യൻ പൗരന്മാർ പാകിസ്താനിലേക്ക് പോകരുതെന്ന ജാഗ്രതാനിർദ്ദേശവും കേന്ദ്രം നൽകിയിട്ടുണ്ട്. സാർക്ക് വിസ ഇളവ് പദ്ധതി (SVES) പ്രകാരം പാകിസ്താൻ പൗരന്മാരെ ഇന്ത്യയിലേക്ക് യാത്ര ചെയ്യാൻ അനുവദിച്ചിരുന്നത് നിർത്തി വെക്കുകയാണെന്ന് വിദേശകാര്യ സെക്രട്ടറി വിക്രം മിശ്രി പറഞ്ഞു. കൂടാതെ SVES വിസയിൽ നിലവിൽ ഏതെങ്കിലും പാകിസ്താൻ പൗരൻ ഇന്ത്യയിലുണ്ടെങ്കിൽ 48 മണിക്കൂറിനകം രാജ്യം വിടുകയും വേണമെന്ന് അദ്ദേഹം അറിയിച്ചു.
പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന സുരക്ഷാകാര്യ മന്ത്രിസഭാ സമിതിയാണ് (സിസിഎസ്) തീരുമാനങ്ങളെടുത്തത്. അട്ടാരിയിലെ ഇന്റഗ്രേറ്റഡ് ചെക്ക്-പോസ്റ്റ് (ഐസിപി) ഉടനടി അടച്ചുപൂട്ടുമെന്നും സാധുവായ രേഖകളുമായി പാകിസ്താനിലേക്ക് പോയവർക്ക് മെയ് 1ന് മുമ്പ് ആ വഴിതന്നെ തിരിച്ചുവരാമെന്നുമാണ് തീരുമാനം.
അതെസമയം പ്രശ്നത്തിൽ ഇന്ത്യ നയതന്ത്ര ഇടപെടലുകൾ തുടരുകയാണ്. വിവിധ രാജ്യങ്ങളുടെ അംബാസ്സഡർമാരുടെ ഒരു യോഗം വിദേശകാര്യ മന്ത്രാലയം വിളിച്ചു ചേർത്തു. വിദേശകാര്യമന്ത്രാലയത്തിൽ നടത്തിയ ഈ യോഗത്തിലേക്ക് ജർമ്മനി, ജപ്പാൻ, പോളണ്ട്, യുകെ, റഷ്യ തുടങ്ങിയ രാജ്യങ്ങളുടെ അംബാസ്സഡർമാർ എത്തിച്ചേർന്നു.
പാകിസ്താനിൽ പ്രധാനമന്ത്രി ഷെഹബാസ് ഷെരീഫ് ദേശീയ സുരക്ഷാ സമിതിയുടെ യോഗം വിളിച്ചിരുന്നു. ഇന്ത്യയുടെ അഞ്ചിന നടപടികളുടെ പശ്ചാത്തലത്തിലാണ് സമിതി യോഗം ചേർന്നത്. ഇന്ത്യ ധൃതിപിടിച്ചാണ് തീരുമാനങ്ങളെടുത്തതെന്നാണ് പാകിസ്താന്റെ ഔദ്യോഗികഭാഷ്യം. ഇന്ത്യയുടെ സമീപനം അപക്വമാണെന്ന് പാക് ഉപപ്രധാനമന്ത്രി ഇഷാഖ് ധര്‍ പ്രസ്താവിച്ചതായി പാകിസ്താൻ മാധ്യമമായ ഡോൺ റിപ്പോര്‍ട്ട് ചെയ്തു. ഇന്ത്യ ഒരു തെളിവുമില്ലാതെയാണ് നടപടികളെടുക്കുന്നതെന്നും അദ്ദേഹം കൂട്ടിച്ചേർത്തു.
