നമ്പർ പ്ലേറ്റില്ലാത്ത സ്കൂട്ടർ പരിശോധിച്ച എസ്.ഐയെ കൈയേറ്റം ചെയ്തു; യുവാവ് റിമാൻഡിൽ

കോഴിക്കോട്: നമ്പർ പ്ലേറ്റില്ലാത്ത സ്കൂട്ടർ പരിശോധിക്കാൻ ശ്രമിച്ച പന്തീരാങ്കാവ് സ്റ്റേഷനിലെ എസ്.ഐയെ അസഭ്യം പറയുകയും യൂണിഫോമിൽ പിടിച്ചുവലിച്ച് കൈയേറ്റം ചെയ്യുകയും ചെയ്ത സംഭവത്തിൽ യുവാവ് അറസ്റ്റിൽ.

ഫറോക്ക് കോളേജിന് സമീപം പള്ളിമീത്തൽ സ്വദേശി അന്താൻതോട്ടത്തിൽ വീട്ടിൽ മുഹമ്മദ് അനസ് (24) ആണ് അറസ്റ്റിലായത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.തൂഫാൻ ഡ്രൈവിന്റെ ഭാഗമായി പന്തീരാങ്കാവ് കിങ് ബാറിന് സമീപം ഡ്യൂട്ടിയിലുണ്ടായിരുന്ന സബ് ഇൻസ്പെക്ടർ വിനോദിന് നേരെയാണ് അതിക്രമമുണ്ടായത്.

നമ്പർ പ്ലേറ്റില്ലാത്ത സ്കൂട്ടറിൽ ഇരിക്കുകയായിരുന്ന അനസിനോട് വാഹനത്തിന്റെ രേഖകൾ ആവശ്യപ്പെട്ടപ്പോഴാണ് സംഭവം. സ്കൂട്ടർ സുഹൃത്തിന്റേതാണെന്നും രേഖകൾ ആവശ്യമെങ്കിൽ സുഹൃത്തിനോട് ചോദിക്കണമെന്നുമായിരുന്നു യുവാവിന്റെ മറുപടി.

തുടർന്ന് വാഹനം പരിശോധിക്കാൻ പോലീസ് ഉദ്യോഗസ്ഥർ ശ്രമിച്ചതോടെ യുവാവ് അസഭ്യം പറയുകയും എസ്.ഐയുടെ യൂണിഫോമിൽ പിടിച്ചുവലിച്ച് കൈയേറ്റം ചെയ്യുകയുമായിരുന്നു വെന്നാണ് പോലീസ് പറയുന്നത്. തുടർന്ന് പോലീസ് ബലപ്രയോഗ ത്തിലൂടെ ഇയാളെ കസ്റ്റഡിയിലെടുക്കുകയായിരുന്നു. കേസെടുത്ത പോലീസ് പ്രതിയെ കോടതിയിൽ ഹാജരാക്കി റിമാൻഡ് ചെയ്തു.