കോടതിക്ക് നൽകിയ ഉറപ്പ് ലംഘിച്ച് പകൽ പൈപ്പിടൽ; നെയ്യാറ്റിൻകരയിൽ ഗതാഗതക്കുരുക്ക് രൂക്ഷം

നെയ്യാറ്റിൻകര: കോടതി നിർദ്ദേശം അവഗണിച്ച് പകൽ സമയത്ത് റോഡ് അടച്ച് കുടിവെള്ള പൈപ്പ് സ്ഥാപിച്ചതിനെ തുടർന്ന് നെയ്യാറ്റിൻകരയിൽ ശനിയാഴ്ച ഗതാഗതക്കുരുക്ക് രൂക്ഷമായി. രാത്രി സമയത്ത് മാത്രമേ പൈപ്പിടൽ ജോലികൾ നടത്തൂവെന്ന് കോടതിക്ക് നൽകിയ ഉറപ്പ് ജല അതോറിറ്റി പാലിക്കാതിരുന്നതാണ് പ്രശ്നങ്ങൾക്ക് വഴിവച്ചത്.
നെയ്യാറ്റിൻകര കോടതി റോഡിലാണ് ശനിയാഴ്ച രാവിലെമുതൽ പൈപ്പിടൽ ആരംഭിച്ചത്.

ശ്രീകൃഷ്ണസ്വാമി ക്ഷേത്രത്തിലേക്കുള്ള വൺവേ റോഡ് അടച്ചുകൊണ്ടാണ് പ്രവർത്തനം നടന്നത്. ഇതോടെ വാഹനങ്ങൾ സ്വദേശാഭിമാനി പാർക്കിനു മുന്നിലൂടെയുള്ള ഇടുങ്ങിയ വഴിയിലൂടെ ഇരുവശ ഗതാഗതത്തിന് തിരിച്ചു വിട്ടതോടെ ഗതാഗതക്കുരുക്ക് വഷളായി. നെയ്യാറ്റിൻകര പുതിയ നഗര കുടിവെള്ള പദ്ധതിയുടെ ഭാഗമായാണ് പൈപ്പുകൾ സ്ഥാപിക്കുന്നത്. നാല് ദിവസത്തേക്ക് കുടിവെള്ള വിതരണം മുടങ്ങുമെന്ന് അധികൃതർ അറിയിച്ചിരുന്നെങ്കിലും, കോടതി റോഡ് അടയ്ക്കുന്നതിനെ കുറിച്ച് മുൻകൂർ അറിയിപ്പ് നൽകിയിരുന്നില്ല.
മുൻപ് തിരഞ്ഞെടുപ്പിന് മുൻപായി ഇതേ പ്രദേശത്ത് രാത്രിയിലാണ് പൈപ്പിടൽ നടത്തിയിരുന്നത്. അന്ന് പൈപ്പ് പൊട്ടിയതിനെ തുടർന്ന് പകൽ ജോലികൾ നടത്തിയപ്പോൾ ഗതാഗതക്കുരുക്ക് അനുഭവപ്പെട്ടിരുന്നു.

തുടർന്നാണ് രാത്രി ജോലികൾക്ക് മാത്രമായി കോടതി മുന്നിൽ ജല അതോറിറ്റി ഉറപ്പ് നൽകിയിരുന്നത്.
എന്നാൽ, ആ ഉറപ്പ് ലംഘിച്ച് ശനിയാഴ്ച രാവിലെ മുതൽ തന്നെ കോടതി റോഡും ക്ഷേത്രത്തിലേക്കുള്ള വഴിയും അടച്ചാണ് ജോലികൾ ആരംഭിച്ചത്. പൈപ്പിടൽ ജോലികൾ തിങ്കളാഴ്ചയ്ക്കകം പൂർത്തിയാക്കുമെന്ന കാര്യത്തിൽ വ്യക്തതയില്ലെന്ന് നാട്ടുകാർ ആരോപിക്കുന്നു.