സോമ്നാഥ് പൈതൃകത്തിന്റെ 75 വർഷങ്ങൾ ആഘോഷിക്കാൻ പ്രത്യേക പരിപാടികൾ മെയ് 8 മുതൽ 11 വരെ

ന്യൂഡൽഹി: ഇന്ത്യയുടെ ആത്മീയ-സാംസ്കാരിക പൈതൃകത്തിന്റെ പ്രതീകമായ സോമ്നാഥ് ക്ഷേത്രത്തിന്റെ ആധുനിക പുനരുജ്ജീവനത്തിന്റെ 75ാം വാർഷികാഘോഷങ്ങൾ മെയ് 8 മുതൽ 11 വരെ വിവിധ പരിപാടികളോടെ സംഘടിപ്പിക്കുന്നു. “സോമ്നാഥ് – വിരാസത് കെ 75 സാൽ” എന്ന പേരിൽ നടക്കുന്ന ആഘോഷങ്ങൾക്ക് രാജ്യത്തിന്റെ വിവിധ ഭാഗങ്ങളിൽ നിന്നുള്ള വിശ്വാസികളും പ്രമുഖരും പങ്കെടുക്കും.

ഇന്ത്യയുടെ അജയ്യമായ സംസ്കാരത്തിന്റെയും ആത്മവിശ്വാസത്തിന്റെയും പ്രതീകമായി സോമ്നാഥ് ക്ഷേത്രം നിലകൊള്ളുന്നുവെന്ന് സംഘാടകർ അറിയിച്ചു. സ്വാതന്ത്ര്യാനന്തര ഇന്ത്യയിൽ സർദാർ വല്ലഭായ് പട്ടേലിന്റെ ദൃഢനിശ്ചയവും നേതൃത്വവുമാണ് സോമ്നാഥ് ക്ഷേത്രത്തിന്റെ ആധുനിക പുനരുജ്ജീവനത്തിന് വഴിയൊരുക്കിയത്. 75 വർഷങ്ങൾക്കിപ്പുറം, പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ഇന്ത്യയുടെ സാംസ്കാരിക നവോത്ഥാനത്തിന്റെ അടയാളമായി സോമ്നാഥ് വീണ്ടും ദേശീയ ശ്രദ്ധാകേന്ദ്രമാകുന്നതായും അധികൃതർ വ്യക്തമാക്കി.

ആഘോഷങ്ങളുടെ ഭാഗമായി ആത്മീയ സമ്മേളനങ്ങൾ, സാംസ്കാരിക പരിപാടികൾ, പൈതൃക പ്രദർശനങ്ങൾ, പ്രത്യേക പൂജകൾ എന്നിവ സംഘടിപ്പിക്കും. ചരിത്രപ്രാധാന്യമുള്ള ഈ ചടങ്ങുകളുമായി ബന്ധപ്പെട്ട് പൊതുജനങ്ങളുടെ സാന്നിധ്യവും പങ്കാളിത്തവും ഉറപ്പാക്കണമെന്ന് ബന്ധപ്പെട്ടവർ അറിയിച്ചു.