മൾട്ടി-ഡൊമെയ്ൻ യുദ്ധത്തിനായി സേനയെ സജ്ജമാക്കാൻ ‘റൺ സംവാദ് 2026’

ബെംഗളൂരു: മൾട്ടി-ഡൊമെയ്ൻ ഓപ്പറേഷനുകൾ (MDO) മുഖ്യവിഷയമാക്കി എയർ ഫോഴ്‌സ് ട്രെയിനിംഗ് കമാൻഡിൽ ഏപ്രിൽ 10ന് സംഘടിപ്പിച്ച രണ്ടു ദിവസത്തെ ദേശീയ സെമിനാർ ‘റൺ സംവാദ് 2026’ സമാപിച്ചു. ചീഫ് ഓഫ് ഡിഫൻസ് സ്റ്റാഫ് ജനറൽ അനിൽ ചൗഹാൻ സമാപന പ്രസംഗം നിർവഹിച്ചു.
മൾട്ടി-ഡൊമെയ്ൻ യുദ്ധത്തിന് ഭൗതിക, സിന്തറ്റിക്, കോഗ്നിറ്റീവ് മേഖലകളുടെ ഏകീകരണം അനിവാര്യമാണെന്ന് അദ്ദേഹം പറഞ്ഞു. കൃത്രിമ ബുദ്ധിയാൽ (AI) നിർണയിക്ക പ്പെടുന്ന യുദ്ധഭൂമിയിൽ വേഗത്തിലുള്ളതും കാര്യക്ഷമവുമായ തീരുമാനമെടുക്കൽ അത്യാവശ്യമാണെന്നും അദ്ദേഹം ചൂണ്ടിക്കാട്ടി.

സമകാലീന യുദ്ധം സമയം, സൈബർ, ഇലക്ട്രോമാഗ്നറ്റിക് സ്പെക്ട്രം, കോഗ്നിഷൻ തുടങ്ങിയ പല മേഖലകളിലായി വ്യാപിച്ചിരിക്കുന്നതിനാൽ ത്രിസേനകളുടെ സമഗ്ര ഏകീകരണവും നവീന ചിന്തയും നിർണായകമാണെന്നും അദ്ദേഹം വ്യക്തമാക്കി. ഏകോപനത്തിൽ നിന്ന് യഥാർത്ഥ ഏകീകരണത്തിലേക്കാണ് ഇപ്പോൾ സേനയുടെ ശ്രദ്ധ മാറിയിരിക്കുന്നതെന്നും അദ്ദേഹം കൂട്ടിച്ചേർത്തു. ‘ട്രാൻസ്പറന്റ് ആൻഡ് എക്സ്പാൻഡഡ് ബാറ്റിൽസ്പേസിൽ ഹൈ ഇൻറൻസിറ്റി ഓപ്പറേഷനുകൾ’ എന്ന വിഷയത്തിൽ ‘റൺ സംവാദ് 2027’ സംഘടിപ്പിക്കുമെന്ന് ജനറൽ ചൗഹാൻ അറിയിച്ചു. തുടർന്ന് മാധ്യമപ്രവർത്തകരുമായി കൂടിക്കാഴ്ച നടത്തിയ അദ്ദേഹം രാഷ്ട്രനിർമ്മാണത്തിൽ മാധ്യമങ്ങളുടെ പങ്ക് പ്രശംസിച്ചു.

സെമിനാറിന്റെ രണ്ടാം ദിവസത്തിൽ മൾട്ടി-ഡൊമെയ്ൻ ഓപ്പറേഷനുകൾക്കായുള്ള സിദ്ധാന്തപരമായ മാറ്റങ്ങളും പരിശീലനവും, ഇൻഫർമേഷൻ സൂപീരിയോറിറ്റിക്കായുള്ള ഐ.എസ്.ആർ (ഇന്റലിജൻസ്, സർവെയിലൻസ് & റീക്കണൈസൻസ്) ഏകീകരണം, സംയുക്ത ആസൂത്രണം തുടങ്ങിയ വിഷയങ്ങളിൽ ത്രിസേനകളിലെ മുതിർന്ന ഉദ്യോഗസ്ഥർ വിശദമായ ചര്‍ച്ചകൾ നടത്തി. പരമ്പരാഗതവും അനിയമിതവുമായ ഭീഷണികളെ നേരിടുന്നതിനുള്ള വെല്ലുവിളികളെക്കുറിച്ചുള്ള പങ്കുവെച്ച ബോധവും സഹകരണാത്മക റോഡ്‌മാപ്പും രൂപപ്പെടുത്തുന്നതിൽ സെമിനാർ വിജയകരമായി. യുദ്ധത്തിന്റെ സങ്കീർണ്ണതകളെക്കുറിച്ചുള്ള ഗൗരവമായ ചര്‍ച്ചകൾക്കും ഇത് വേദിയായതായി സംഘാടകർ അറിയിച്ചു. മൾട്ടി-ഡൊമെയ്ൻ യുദ്ധഭൂമിയിൽ നിർണായക മേൽക്കൈയും പ്രവർത്തന മികവും കൈവരിക്കാൻ ഇന്ത്യൻ പ്രതിരോധ സേനകളുടെ പ്രതിബദ്ധതയെ ഈ സംവാദം വീണ്ടും ഉറപ്പിച്ചതായി വിലയിരുത്തുന്നു.