വാർത്തകളെ നെഞ്ചോട് ചേർത്ത ലേഖകന് അംഗീകാരം

കെ. മണിലാലിന് പത്രാധിപർ കെ. സുകുമാരൻ സ്മാരക പുരസ്കാരം

തിരുവനന്തപുരം: മികച്ച പ്രാദേശിക ലേഖകനുള്ള പത്രാധിപർ കെ. സുകുമാരൻ സ്മാരക പുരസ്കാരത്തിന് കേരളകൗമുദി വിതുര ലേഖകൻ കെ. മണിലാലിനെ തിരഞ്ഞെടുത്തു.

വർഷങ്ങളായി അർപ്പണബോധത്തോടെയും സമർപ്പണ മനോഭാവത്തോടെയും കേരളകൗമുദിയുടെ വിതുര പ്രാദേശിക ലേഖകനായി പ്രവർത്തിച്ചുവരുന്ന കെ. മണിലാലിന്റെ പ്രവർത്തന മികവിനുള്ള അംഗീകാരമായാണ് പുരസ്കാരം.ഡെസ്കിൽ നിന്ന് നിർദേശിക്കുന്ന വാർത്തകൾ ഉത്തരവാദിത്വത്തോടെയും കൃത്യതയോടെയും റിപ്പോർട്ട് ചെയ്യുന്നതിൽ മണിലാൽ മികവ് പുലർത്തുന്നുവെന്ന് കേരളകൗമുദി യൂണിറ്റ് ചീഫ് ആർ. ചന്ദ്രദത്ത് പറഞ്ഞു.

രാവിലെ എട്ടുമണി മുതൽ തന്നെ ന്യൂസ്ട്രാക്കിലൂടെ വാർത്തകൾ അയയ്ക്കുന്ന അദ്ദേഹം, വിതുര മേഖലയ്ക്ക് പുറത്തുള്ള വാർത്തകൾ ശ്രദ്ധയിൽപ്പെട്ടാൽ ബന്ധപ്പെട്ട ലേഖകരെയും ഡെസ്കിനെയും ഉടൻ അറിയിക്കുന്നതിലും താൽപര്യം കാണിക്കുന്നു.

ഡെസ്കിൽ നിന്ന് ഏത് സമയത്ത് വാർത്ത ആവശ്യപ്പെട്ടാലും വിമുഖതയില്ലാതെ, വിശദാംശങ്ങൾ ചോരാതെ വേഗത്തിൽ വാർത്ത എത്തിക്കുന്നതിലും മണിലാൽ മുന്നിലാണ്. വാർത്താ ശേഖരണത്തിലെ ഈ സമർപ്പണത്തിനൊപ്പം സർക്കുലേഷൻ, പരസ്യ വിഭാഗങ്ങൾക്ക് നൽകുന്ന പിന്തുണയും പുരസ്കാരത്തിനായി പരിഗണിച്ചതായി ആർ. ചന്ദ്രദത്ത് വ്യക്തമാക്കി.