പൂർണ്ണ എജുക്കേഷൻ ഫൗണ്ടേഷൻ പുരസ്കാരം വി. എം. സുധീരന്

വർക്കല: പൂർണ്ണ എജുക്കേഷൻ ഫൗണ്ടേഷൻ ഏർപ്പെടുത്തിയ എട്ടാമത് പൂർണ്ണ പുരസ്കാരത്തിന് മുതിർന്ന കോൺഗ്രസ് നേതാവും മുൻ കെ.പി.സി.സി. പ്രസിഡന്റുമായ വി. എം. സുധീരനെ തെരഞ്ഞെടുത്തു. ഫൗണ്ടേഷൻ പ്രസിഡന്റ് ഡോ. പി. കെ. സുകുമാരനാണ് ഇക്കാര്യം അറിയിച്ചത്.

പാർലമെന്ററി വ്യാമോഹങ്ങൾക്കതീതമായി സംശുദ്ധ രാഷ്ട്രീയജീവിതം നയിക്കുകയും, പൊതുപ്രവർത്തനരംഗത്ത് വരുംതലമുറയ്ക്ക് മാതൃകയായ വ്യക്തിത്വമായി നിലകൊള്ളുകയും ചെയ്യുന്ന നേതാവെന്ന വിലയിരുത്തലിന്റെ അടിസ്ഥാനത്തിലാണ് സുധീരനെ പുരസ്കാരത്തിന് തെരഞ്ഞെടുത്തതെന്ന് അവാർഡ് കമ്മിറ്റി അറിയിച്ചു.

ഡോ. എസ്. ജയപ്രകാശ്, ജി. പ്രിയദർശനൻ, ഡോ. ജയരാജ് എന്നിവർ അംഗങ്ങളായ ജൂറി കമ്മിറ്റിയാണ് പുരസ്കാര ജേതാവിനെ തെരഞ്ഞെടുത്തത്. പൂർണ്ണ എജുക്കേഷൻ ഫൗണ്ടേഷന്റെ സിൽവർ ജൂബിലിയോടനുബന്ധിച്ച് ഏർപ്പെടുത്തിയിരിക്കുന്ന പുരസ്കാരത്തിൽ ഒരു ലക്ഷം രൂപയും പ്രശസ്തിപത്രവും ഫലകവും ഉൾപ്പെടും.

ജൂലൈ 7-ന് (ചൊവ്വാഴ്ച) വൈകിട്ട് 3 മണിക്ക് എം.ജി.എം. സ്കൂൾ ഓഡിറ്റോറിയത്തിൽ നടക്കുന്ന സാംസ്കാരിക സമ്മേളനത്തിൽ കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ പുരസ്കാരം സമ്മാനിക്കും. ഡോ. പി. കെ. സുകുമാരൻ അധ്യക്ഷത വഹിക്കുന്ന ചടങ്ങിൽ വർക്കല എം.എൽ.എ അഡ്വ. വി. ജോയി മുഖ്യപ്രഭാഷണം നടത്തും.ഇലകമൺ ഗ്രാമപഞ്ചായത്ത് പ്രസിഡന്റ് ശ്രീധരൻ കുമാർ, ചെമ്മരുതി ഗ്രാമപഞ്ചായത്ത് പ്രസിഡന്റ് രാരിഷ്, ഡോ. എസ്. ജയപ്രകാശ്, ഡോ. സജിത് വിജയരാഘവൻ, ഡോ. എസ്. പൂജ, എം. ജി. കെ. പിള്ള എന്നിവർ ചടങ്ങിൽ സംസാരിക്കും.