വജ്രജൂബിലി ആഘോഷത്തിൽ പാങ്ങോട് സൈനിക കേന്ദ്ര ആസ്ഥാനം; മികച്ച ഉദ്യോഗസ്ഥർക്ക് ആദരം

തിരുവനന്തപുരം: ഇന്ത്യൻ സൈന്യത്തിനും രാജ്യത്തിനും ആറു പതിറ്റാണ്ടായി സമർപ്പിത സേവനം അനുഷ്ഠിച്ച പാങ്ങോട് സൈനിക കേന്ദ്ര ആസ്ഥാനം ജൂൺ 29-ന് 60-ാം സ്ഥാപകദിനമായ വജ്രജൂബിലി ആഘോഷിച്ചു.

യുദ്ധസ്മാരകത്തിൽ പുഷ്പചക്ര സമർപ്പണത്തോടെയാണ് ആഘോഷങ്ങൾക്ക് തുടക്കമായത്. തുടർന്ന് നടന്ന പ്രത്യേക സൈനിക സമ്മേളനത്തിൽ പാങ്ങോട് സൈനിക കേന്ദ്ര മേധാവി ബ്രിഗേഡിയർ അനുരാഗ് ഉപാധ്യായ മികച്ച ഉദ്യോഗസ്ഥരെ ആദരിച്ചു.

1966 ജൂൺ 29-ന് സ്ഥാപിതമായ പാങ്ങോട് സൈനിക കേന്ദ്ര ആസ്ഥാനം ദക്ഷിണേന്ത്യയിലെ സൈനിക സേവന നിർവഹണം, സൈനിക കേന്ദ്രങ്ങളുടെ നടത്തിപ്പ്, വിമുക്തഭട ക്ഷേമ പ്രവർത്തനങ്ങൾ എന്നിവയുടെ പ്രധാന കേന്ദ്രമായി കഴിഞ്ഞ ആറു പതിറ്റാണ്ടായി പ്രവർത്തിച്ചുവരുന്നതായി ബ്രിഗേഡിയർ അനുരാഗ് ഉപാധ്യായ പറഞ്ഞു.

കേരളത്തിലും തമിഴ്നാട്ടിലുമുള്ള സേവനമനുഷ്ഠിക്കുന്ന ഉദ്യോഗസ്ഥരും വിമുക്തഭടന്മാരും ചടങ്ങിൽ പങ്കെടുത്തു.
വജ്രജൂബിലിയോടനുബന്ധിച്ച് സംഘടിപ്പിച്ച സാംസ്കാരിക സായാഹ്നത്തിൽ പാങ്ങോട് സൈനിക കേന്ദ്രത്തിന്റെ സമ്പന്നമായ പൈതൃകവും സംഭാവനകളും അവതരിപ്പിച്ചു. കേരളത്തിന്റെ തനത് കലാരൂപങ്ങളായ കഥകളി, തെയ്യം, ശിങ്കാരി മേളം, മോഹിനിയാട്ടം, ഒപ്പന എന്നിവയും അരങ്ങേറി. ഉദ്യോഗസ്ഥരും സൈനികരും കുടുംബാംഗങ്ങളും പരിപാടിയിൽ പങ്കാളികളായി.

കേരളത്തിലും തമിഴ്നാട്ടിലുമായി പ്രവർത്തിക്കുന്ന 11 ഇ.സി.എച്ച്.എസ്. പോളിക്ലിനിക്കുകൾ, ഒരു വെറ്ററൻ സെൽ, 10 വിമുക്തഭട കാന്റീനുകൾ എന്നിവയിലൂടെ 5.97 ലക്ഷം വിമുക്തഭടന്മാർക്കും വിധവകൾക്കും ആശ്രിതർക്കും സേവനം ലഭ്യമാക്കുന്നതിൽ പാങ്ങോട് സൈനിക കേന്ദ്ര ആസ്ഥാനം നിർണായക പങ്ക് വഹിക്കുന്നുണ്ടെന്നും അദ്ദേഹം പറഞ്ഞു.

അടിസ്ഥാന സൗകര്യ വികസനം, നിയമ-അച്ചടക്ക കാര്യങ്ങൾ, വിദ്യാഭ്യാസ സ്ഥാപനങ്ങളുടെ ഭരണം, മാനുഷിക സഹായം, ദുരന്തനിവാരണ പ്രവർത്തനങ്ങൾ, സിവിൽ-സൈനിക ബന്ധം, സൈനികരുടെ ഭൗതിക ശരീരങ്ങളോടുള്ള ആദരവ് എന്നിവ ഉൾപ്പെടെ നിരവധി ഉത്തരവാദിത്തങ്ങൾ വിജയകരമായി നിർവഹിക്കുന്ന ആസ്ഥാനമാണിതെന്നും അദ്ദേഹം ചൂണ്ടിക്കാട്ടി. “ദി മൂവേഴ്‌സ്” എന്നറിയപ്പെടുന്ന പാങ്ങോട് സൈനിക കേന്ദ്ര ആസ്ഥാനം സേവനത്തിന്റെയും പ്രതിരോധശേഷിയുടെയും പ്രതിബദ്ധതയുടെയും പ്രതീകമാണെന്നും അദ്ദേഹം പറഞ്ഞു.

ഉദ്യോഗസ്ഥർ, വിമുക്തഭടന്മാർ, കുടുംബാംഗങ്ങൾ എന്നിവർ പങ്കെടുത്ത ചടങ്ങിൽ അഡ്മിൻ കമാൻഡന്റ് കേണൽ സൂര്യ മുഖർജി നന്ദി രേഖപ്പെടുത്തി.