ഓപ്പറേഷന്‍ ഡി-ഹണ്ട്: 44 പേര്‍ അറസ്റ്റില്‍; എം.ഡി.എം.എയും കഞ്ചാവും ഉള്‍പ്പെടെ മയക്കുമരുന്ന് പിടിച്ചെടുത്തു

തിരുവനന്തപുരം: സംസ്ഥാനത്ത് മയക്കുമരുന്ന് വിരുദ്ധ പ്രവര്‍ത്തനങ്ങളുടെ ഭാഗമായി ഏപ്രില്‍ 24ന് നടത്തിയ ‘ഓപ്പറേഷന്‍ ഡി-ഹണ്ട്’ പ്രത്യേക പരിശോധനയില്‍ 44 പേരെ പോലീസ് അറസ്റ്റ് ചെയ്തു. മയക്കുമരുന്ന് വില്‍പ്പനയില്‍ ഏര്‍പ്പെടുന്നതായി സംശയിക്കുന്ന 1259 പേരെ പരിശോധനയ്ക്ക് വിധേയമാക്കിയതായി അധികൃതര്‍ അറിയിച്ചു.പരിശോധനയുടെ ഭാഗമായി വിവിധതരം നിരോധിത മയക്കുമരുന്നുകള്‍ കൈവശം വച്ചതിന് 37 കേസുകള്‍ രജിസ്റ്റര്‍ ചെയ്തു. പ്രതികളില്‍ നിന്നും എം.ഡി.എം.എ (0.1486 കിലോഗ്രാം), കഞ്ചാവ് (12.273 കിലോഗ്രാം), കഞ്ചാവ് ബീഡി (19 എണ്ണം) എന്നിവ പോലീസ് പിടിച്ചെടുത്തു. നിരോധിത മയക്കുമരുന്നുകളുടെ സംഭരണവും വിപണനവും നടത്തുന്നവരെ കണ്ടെത്തി കര്‍ശന നിയമനടപടികള്‍ സ്വീകരിക്കുന്നതിനാണ് സംസ്ഥാനവ്യാപകമായി ഓപ്പറേഷന്‍ ഡി-ഹണ്ട് സംഘടിപ്പിച്ചതെന്ന് പോലീസ് വ്യക്തമാക്കി.

പൊതുജനങ്ങളില്‍ നിന്ന് മയക്കുമരുന്ന് സംബന്ധിച്ച വിവരങ്ങള്‍ സ്വീകരിക്കാന്‍ 24 മണിക്കൂറും പ്രവര്‍ത്തിക്കുന്ന ആന്റി നര്‍ക്കോട്ടിക് കണ്‍ട്രോള്‍ റൂം (9497927797) സജ്ജമാണ്. ഈ നമ്പറിലേക്ക് ലഭിക്കുന്ന വിവരങ്ങള്‍ രഹസ്യമായി സൂക്ഷിക്കുമെന്നും അധികൃതര്‍ അറിയിച്ചു.
മയക്കുമരുന്ന് വിരുദ്ധ പ്രവര്‍ത്തനങ്ങള്‍ ശക്തിപ്പെടുത്തുന്നതിനായി ക്രമസമാധാന വിഭാഗം എ.ഡി.ജി.പി യുടെ മേല്‍നോട്ടത്തില്‍ സംസ്ഥാന തലത്തില്‍ ആന്റി നര്‍ക്കോട്ടിക്സ് ഇന്റലിജന്‍സ് സെല്ലും എന്‍.ഡി.പി.എസ് കോര്‍ഡിനേഷന്‍ സെല്ലും റേഞ്ച് അടിസ്ഥാനത്തിലുള്ള യൂണിറ്റുകളും പ്രവര്‍ത്തിച്ചു വരുന്നു.