അങ്കണവാടി കുട്ടികൾക്ക് സഹായഹസ്തവുമായി നേവൽ വെറ്ററൻസ് സൊസൈറ്റി

തിരുവനന്തപുരം: സാമൂഹിക പ്രതിബദ്ധതയുടെ ഭാഗമായി ഇന്ത്യൻ നേവൽ വെറ്ററൻസ് സൊസൈറ്റി (INVeS) പാങ്ങോട് മേഖലയിലെ അങ്കണവാടി കുട്ടികൾക്കായി വിദ്യാഭ്യാസ സഹായ പരിപാടി സംഘടിപ്പിച്ചു. വെറ്റമുക്ക് കട്ടച്ചൽ റോഡിലുള്ള അങ്കണവാടിയിൽ നടന്ന ചടങ്ങിൽ കുട്ടികൾക്ക് വിവിധ പഠനോപകരണങ്ങളും ആവശ്യ സാധനങ്ങളും വിതരണം ചെയ്തു.കുട്ടികളുടെ പഠനത്തിനും ദൈനംദിന ആവശ്യങ്ങൾക്കും സഹായകരമായ രീതിയിൽ ടോഡ്‌ലർ ബാഗുകൾ, വാട്ടർ ബോട്ടിലുകൾ, കുടകൾ, ക്രയോണുകൾ, കളറിംഗ് പുസ്തകങ്ങൾ, ലഘുഭക്ഷണ പെട്ടികൾ എന്നിവ ഉൾപ്പെടുത്തിയ വിദ്യാഭ്യാസ സ്റ്റാർട്ടർ കിറ്റുകളാണ് വിതരണം ചെയ്തത്.

നേവൽ വെറ്ററൻസ് സൊസൈറ്റി അംഗങ്ങളുടെ സംഭാവനകളും പിന്തുണയും വഴിയാണ് പദ്ധതി നടപ്പാക്കാനായതെന്ന് ഭാരവാഹികൾ അറിയിച്ചു. പരിപാടി വിജയകരമാക്കാൻ സഹകരിച്ച എല്ലാ അംഗങ്ങൾക്കും സംഘടന നന്ദി രേഖപ്പെടുത്തി.സംസ്ഥാനത്തുടനീളമുള്ള സ്കൂൾ വിദ്യാർഥികൾ, സാമൂഹിക-സാമ്പത്തികമായി പിന്നാക്കം നിൽക്കുന്ന കുടുംബങ്ങൾ, മറ്റ് അർഹരായ വിഭാഗങ്ങൾ എന്നിവരെ വിദ്യാഭ്യാസ-ക്ഷേമ പദ്ധതികളിലൂടെ പിന്തുണയ്ക്കുന്നതിനുള്ള വിപുലമായ സമൂഹസമ്പർക്ക പ്രവർത്തനങ്ങളുടെ ഭാഗമായാണ് പരിപാടി സംഘടിപ്പിച്ചതെന്ന് INVeS ഭാരവാഹികൾ വ്യക്തമാക്കി.

INVeS സെക്രട്ടറി സുനിൽ നിത്യാനന്ദൻ, എക്സിക്യൂട്ടീവ് കമ്മിറ്റി അംഗം ജി. സുനിൽ കുമാർ എന്നിവർ ചടങ്ങിൽ സംഘടനയെ പ്രതിനിധീകരിച്ചു. വാർഡ് കൗൺസിലർ വിഷ്ണു മോഹൻ, നാട്ടുകാർ, രക്ഷിതാക്കൾ, അങ്കണവാടി അധ്യാപകർ, ജീവനക്കാർ എന്നിവർ പങ്കെടുത്തു.