നാവായിക്കുളത്ത് സത്യപ്രതിജ്ഞാ ചടങ്ങ് സി.പി.ഐ. ബഹിഷ്കരിച്ചു.

കല്ലമ്പലം : മത്സരിച്ച നാലു വാർഡുകളിലും സി.പി.എം. നേതൃത്വം പരാജയപ്പെടുത്തി എന്നാരോപിച്ച് നാവായിക്കുളം പഞ്ചായത്തിലെ അംഗങ്ങളുടെ സത്യപ്രതിജ്ഞാ ചടങ്ങ് സി.പി.ഐ. ബഹിഷ്കരിച്ചു. ഗ്രൂപ്പുപോരിൽ സ്വന്തം സ്ഥാനാർഥികളെപ്പോലും സി.പി.എം. ഒതുക്കാൻ ശ്രമിച്ചതായും മേഖലയിലുണ്ടായ എൽ.ഡി.എഫ്. മുന്നേറ്റം നാവായിക്കുളത്തിനു സാധ്യമാകാതെ വന്നത് സി.പി.എമ്മിലെ വിഭാഗീയതയാണെന്നും സി.പി.ഐ. ആരോപിക്കുന്നു.

എന്നാൽ, സംഘടനാ ശേഷിയില്ലാത്തതിനാൽ പരാജയപ്പെട്ടതിന് സി.പി.എമ്മിനെ കുറ്റപ്പെടുത്താനാണ് സി.പി.ഐ. ശ്രമിക്കുന്നതെന്നാണ് സി.പി.എം. വൃത്തങ്ങൾ പറയുന്നത്.