മന്ത്രി ഒ. ജെ. ജനീഷ് ശിവഗിരി മഠം സന്ദർശിച്ചു

യുവാക്കളെ കായികരംഗത്തേക്ക് ആകർഷിക്കാൻ സർക്കാർ കൂടുതൽ സൗകര്യങ്ങൾ ഒരുക്കും: മന്ത്രി

വർക്കല: മന്ത്രി ഒ. ജെ. ജനീഷ് വെള്ളിയാഴ്ച വൈകുന്നേരം ശിവഗിരി മഠം സന്ദർശിച്ചു. വൈകുന്നേരം 6.45ഓടെ മഠത്തിലെത്തിയ മന്ത്രിയെ ശിവഗിരി മഠം സെക്രട്ടറി സ്വാമി ശുഭാഗാനന്ദയും ട്രഷറർ ശാരദാനന്ദ സ്വാമികളും ചേർന്ന് സ്വീകരിച്ചു.

മന്ത്രി മഠം പ്രസിഡന്റ് സ്വാമി സച്ചിദാനന്ദയുടെ മുറിയിലെത്തി മന്ത്രി അനുഗ്രഹം വാങ്ങി. പിന്നാലെ സ്വാമിമാരും മന്ത്രിയും തമ്മിൽ അടച്ചിട്ട മുറിയിൽ ചർച്ച നടത്തി. ശിവഗിരി മഠത്തിന്റെ പ്രവർത്തനങ്ങൾ, സാമൂഹിക-സാംസ്കാരിക വിഷയങ്ങൾ, യുവതലമുറ നേരിടുന്ന വെല്ലുവിളികൾ തുടങ്ങിയ വിഷയങ്ങളാണ് ചർച്ചയായതെന്ന് അറിയുന്നു.

ശേഷം ശ്രീനാരായണ ഗുരുദേവന്റെ മഹാസമാധിയിലെത്തിയ മന്ത്രി പ്രത്യേക പൂജയും പ്രാർത്ഥനയും നടത്തി. ഗുരുദേവന്റെ സന്ദേശങ്ങൾ ഇന്നത്തെ സമൂഹത്തിനും ഏറെ പ്രസക്തമാണെന്ന് മന്ത്രി അഭിപ്രായപ്പെട്ടു.സന്ദർശനത്തിന് പിന്നാലെ മാധ്യമങ്ങളോട് സംസാരിക്കവെ, ഇന്നത്തെ യുവതലമുറയിൽ മയക്കുമരുന്നിനോടും മൊബൈൽ ഫോൺ ഉപയോഗത്തോടുമുള്ള അമിത ആസക്തി വർധിച്ചുവരുന്നതായി മന്ത്രി പറഞ്ഞു. യുവാക്കളെ ഇത്തരം പ്രവണതകളിൽ നിന്ന് പിന്തിരിപ്പിക്കാൻ കായിക-സാംസ്കാരിക മേഖലകളിൽ കൂടുതൽ സജീവമാക്കേണ്ടത് അനിവാര്യമാണെന്നും അദ്ദേഹം വ്യക്തമാക്കി.

ഇതിനായി സംസ്ഥാന സർക്കാർ കായിക അടിസ്ഥാന സൗകര്യങ്ങളുടെ വികസനത്തിന് കൂടുതൽ പ്രാധാന്യം നൽകുമെന്നും, ഗ്രാമപ്രദേശങ്ങളിലുൾപ്പെടെ യുവാക്കൾക്ക് പരിശീലനവും കളിസ്ഥലങ്ങളും ലഭ്യമാക്കുന്നതിനുള്ള നടപടികൾ ശക്തമാക്കുമെന്നും മന്ത്രി കൂട്ടിച്ചേർത്തു.