ലെഫ്റ്റനന്റ് ജനറൽ എൻ.എസ്. രാജ സുബ്രമണി പുതിയ സംയുക്ത സേനാ മേധാവി

ന്യൂഡൽഹി: ലെഫ്റ്റനന്റ് ജനറൽ എൻ.എസ്. രാജ സുബ്രമണിയെ രാജ്യത്തിന്റെ പുതിയ സംയുക്ത സേനാ മേധാവിയായി നിയമിച്ചു. ചുമതലയേൽക്കുന്ന തീയതി മുതൽ പുതിയ ഉത്തരവ് വരുന്നതുവരെ അദ്ദേഹം കേന്ദ്ര സർക്കാരിന്റെ സൈനിക കാര്യ വകുപ്പിന്റെ സെക്രട്ടറിയായും പ്രവർത്തിക്കും. നിലവിലെ ചീഫ് ഓഫ് ഡിഫൻസ് സ്റ്റാഫ് ജനറൽ അനിൽ ചൗഹാൻ 2026 മേയ് 30ന് കാലാവധി പൂർത്തിയാക്കുന്നതോടെയാണ് പുതിയ നിയമനം.2025 സെപ്റ്റംബർ ഒന്നുമുതൽ ദേശീയ സുരക്ഷാ കൗൺസിൽ സെക്രട്ടേറിയറ്റിൽ സൈനിക ഉപദേഷ്ടാവായി പ്രവർത്തിച്ചുവരികയാണ് ലെഫ്റ്റനന്റ് ജനറൽ രാജ സുബ്രമണി. അതിന് മുൻപ് 2024 ജൂലൈ മുതൽ 2025 ജൂലൈ വരെ കരസേനാ ഉപമേധാവിയായിരുന്നു. 2023 മാർച്ച് മുതൽ 2024 ജൂൺ വരെ സെൻട്രൽ കമാൻഡിന്റെ ജനറൽ ഓഫീസർ കമാൻഡിംഗ്-ഇൻ-ചീഫായും സേവനമനുഷ്ഠിച്ചു.

നാഷണൽ ഡിഫൻസ് അക്കാദമിയിലും ഇന്ത്യൻ മിലിട്ടറി അക്കാദമിയിലും പഠനം പൂർത്തിയാക്കിയ അദ്ദേഹം 1985 ഡിസംബർ 14നാണ് ഗർവാൾ റൈഫിൾസിന്റെ എട്ടാം ബറ്റാലിയനിൽ കമ്മീഷൻ നേടിയത്. യുകെയിലെ ബ്രാക്നെൽ ജോയിന്റ് സർവീസസ് കമാൻഡ് ആൻഡ് സ്റ്റാഫ് കോളേജിലെയും ന്യൂഡൽഹിയിലെ നാഷണൽ ഡിഫൻസ് കോളേജിലെയും പൂർവ വിദ്യാർത്ഥിയാണ്. ലണ്ടനിലെ കിംഗ്സ് കോളേജിൽ നിന്ന് ആർട്സിൽ ബിരുദാനന്തര ബിരുദവും മദ്രാസ് സർവകലാശാലയിൽ നിന്ന് ഡിഫൻസ് സ്റ്റഡീസിൽ എംഫിലും നേടിയിട്ടുണ്ട്.

40 വർഷത്തിലേറെ നീണ്ട സൈനിക സേവനത്തിനിടെ വിവിധ സംഘർഷ മേഖലകളിലും അതിർത്തി പ്രദേശങ്ങളിലും അദ്ദേഹം സേവനമനുഷ്ഠിച്ചു. ഓപ്പറേഷൻ റിനോയുടെ ഭാഗമായി അസമിലെ കൗണ്ടർ ഇൻസർജൻസി പ്രവർത്തനങ്ങളിൽ 16 ഗർവാൾ റൈഫിൾസിനെയും, ജമ്മു-കശ്മീരിലെ 168 ഇൻഫൻട്രി ബ്രിഗേഡിനെയും, സെൻട്രൽ സെക്ടറിലെ 17 മൗണ്ടൻ ഡിവിഷനെയും അദ്ദേഹം നയിച്ചു. പടിഞ്ഞാറൻ അതിർത്തിയിലെ ഇന്ത്യൻ സൈന്യത്തിന്റെ പ്രധാന സ്ട്രൈക്ക് കോർപ്സായ 2 കോർപ്സിനെയും അദ്ദേഹം കമാൻഡ് ചെയ്തിട്ടുണ്ട്.

നാഷണൽ ഡിഫൻസ് അക്കാദമിയിലെ ഡിവിഷണൽ ഓഫീസർ മുതൽ നോർത്തേൺ കമാൻഡിലെ ചീഫ് ഓഫ് സ്റ്റാഫ് വരെയുള്ള നിരവധി സുപ്രധാന സ്റ്റാഫ്, ഇൻസ്ട്രക്ഷണൽ ചുമതലകളും അദ്ദേഹം വഹിച്ചു. പടിഞ്ഞാറൻ, വടക്കൻ അതിർത്തികളിലെ സൈനിക പ്രവർത്തനങ്ങളെക്കുറിച്ചുള്ള വിശാലമായ പരിചയസമ്പത്തും അദ്ദേഹത്തിനുണ്ട്. വിശിഷ്ട സേവനങ്ങൾ പരിഗണിച്ച് പരമ വിശിഷ്ട സേവാ മെഡൽ, അതി വിശിഷ്ട സേവാ മെഡൽ, സേനാ മെഡൽ, വിശിഷ്ട സേവാ മെഡൽ എന്നിവ നൽകി രാജ്യം അദ്ദേഹത്തെ ആദരിച്ചിട്ടുണ്ട്.