പള്ളിക്കൽ ചെമ്മരം വാർഡിൽ കുടുംബശ്രീ–പാലിയേറ്റീവ് ഓണക്കിറ്റ് വിതരണം; അമ്മമാർക്ക് ഓണക്കോടിയും

പള്ളിക്കൽ: പള്ളിക്കൽ ഗ്രാമപഞ്ചായത്തിലെ ചെമ്മരം വാർഡിൽ കുടുംബശ്രീ–പാലിയേറ്റീവ് അംഗങ്ങൾക്ക് ഭക്ഷ്യധാന്യ ഓണക്കിറ്റ് വിതരണം ചെയ്യുകയും വയോധികരായ അമ്മമാരെ ഓണക്കോടി നൽകി ആദരിക്കുകയും ചെയ്തു.

വാർഡ് മെമ്പർ പള്ളിക്കൽ നസീറിന്റെ അധ്യക്ഷതയിൽ നടന്ന ചെമ്മരം വാർഡ് തല ഓണാഘോഷ പരിപാടി ബ്ലോക്ക് പഞ്ചായത്ത് സ്റ്റാൻഡിങ് കമ്മിറ്റി ചെയർപേഴ്സൺ എം. ഹസീന ഉദ്ഘാടനം ചെയ്തു. കുടുംബശ്രീ സി.ഡി.എസ് അംഗം ഷാലിമോൾ സ്വാഗതം പറഞ്ഞു.
വാർഡിലെ ആറ് അമ്മമാരെ ചടങ്ങിൽ ഓണക്കോടി നൽകി ആദരിച്ചു. കുടുംബശ്രീ പാലിയേറ്റീവ് അംഗങ്ങൾക്കുള്ള ഭക്ഷ്യധാന്യ കിറ്റും വിതരണം ചെയ്തു.

പഞ്ചായത്ത് പ്രസിഡന്റ് സതീവൻ എം., ജനപ്രതിനിധികളായ ഷീബ, ദിവ്യറാണി, ലതിക എന്നിവർ പങ്കെടുത്തു. തൊഴിലുറപ്പ് അംഗങ്ങൾ, കുടുംബശ്രീ അംഗങ്ങൾ, പ്രദേശവാസികൾ തുടങ്ങിയവരും ചടങ്ങിൽ സംബന്ധിച്ചു.

വാർഡ് മെമ്പറാകുന്നതിന് മുൻപും പള്ളിക്കൽ നസീർ പത്ത് വർഷത്തോളം വാർഡ് തലത്തിൽ ഇത്തരം ഓണാഘോഷ പരിപാടികൾ സംഘടിപ്പിച്ചുവരുന്നതായി സംഘാടകർ അറിയിച്ചു. ചെമ്മരം വാർഡിലെ ഓണാഘോഷ പരിപാടികൾ മാതൃകാപരവും ശ്രദ്ധേയവുമായി.