അഖിലേന്ത്യാ സൈനിക സ്കൂൾ പ്രിൻസിപ്പൽമാരുടെ സമ്മേളനത്തിന് കഴക്കൂട്ടം വേദി

രാഷ്ട്രനിർമ്മാണത്തിൽ സൈനിക സ്കൂളുകളുടെ പങ്ക് നിർണായകമെന്ന് പ്രതിരോധ സഹമന്ത്രി

കഴക്കൂട്ടം: 52-ാമത് അഖിലേന്ത്യാ സൈനിക സ്കൂൾ പ്രിൻസിപ്പൽമാരുടെ സമ്മേളനം കഴക്കൂട്ടം സൈനിക് സ്കൂളിൽ ആരംഭിച്ചു. പ്രതിരോധ സഹമന്ത്രി സഞ്ജയ് സേട്ട് സമ്മേളനം ഉദ്ഘാടനം ചെയ്തു.രാജ്യത്തെ 33 സൈനിക സ്കൂളുകളിലെ പ്രതിനിധികളെയും 79 പുതിയ സൈനിക സ്കൂളുകളിലെ പ്രിൻസിപ്പൽമാരെയും വീഡിയോ കോൺഫറൻസിംഗിലൂടെ അഭിസംബോധന ചെയ്ത മന്ത്രി, അച്ചടക്കമുള്ളതും ഉത്തരവാദിത്തബോധമുള്ളതുമായ ദേശസ്നേഹികളായ യുവാക്കളെ വളർത്തുന്നതിൽ സൈനിക സ്കൂളുകളുടെ പങ്ക് നിർണായകമാണെന്ന് പറഞ്ഞു. സായുധ സേനകൾക്കായി ഭാവി ഉദ്യോഗസ്ഥരെ ഒരുക്കുന്നതിൽ അക്കാദമിക് മികവും നേതൃത്വശേഷിയും സ്വഭാവ രൂപീകരണവും ഏറെ പ്രധാനമാണെന്നും അദ്ദേഹം വ്യക്തമാക്കി.

പ്രതിരോധ മന്ത്രാലയത്തിലെ ജോയിന്റ് സെക്രട്ടറിയും സൈനിക് സ്കൂൾ സൊസൈറ്റിയുടെ ഓണററി സെക്രട്ടറിയുമായ സത്യജിത് മൊഹന്തി ഐആർഎസ്, ഇൻസ്പെക്ടിംഗ് ഓഫീസർമാരായ കമാൻഡർ ആർ.കെ. ശർമ്മ, ബ്രിഗേഡിയർ അമിത് ചാറ്റർജി, എയർ കമ്മഡോർ ശക്തി ശർമ്മ, ഡയറക്ടർ മിലിട്ടറി & സൈനിക് സ്കൂൾ കെ.വി. അജിത് എന്നിവർ ഉൾപ്പെടെ രാജ്യത്തുടനീളമുള്ള 33 സൈനിക് സ്കൂളുകളുടെ പ്രിൻസിപ്പൽമാർ സമ്മേളനത്തിൽ പങ്കെടുത്തു. നാളെ സമ്മേളനം സമാപിക്കും.

യുദ്ധസ്മാരകത്തിൽ പുഷ്പാർച്ചന നടത്തിയതോടെയാണ് ചടങ്ങുകൾ ആരംഭിച്ചത്. തുടർന്ന് പ്രതിരോധ സഹമന്ത്രി വിളക്ക് കൊളുത്തി സമ്മേളനം ഔപചാരികമായി ഉദ്ഘാടനം ചെയ്തു. അക്കാദമിക് മികവ്, സ്ഥാപന പ്രവർത്തന അവലോകനം, നയപരമായ വിഷയങ്ങൾ, സൈനിക് സ്കൂൾ സംവിധാനം ശക്തിപ്പെടുത്താനുള്ള ഭാവി പദ്ധതികൾ എന്നിവ സമ്മേളനത്തിൽ ചർച്ചയായി.
2025-ലെ രക്ഷാമന്ത്രി ട്രോഫി നേടിയ നഗ്രോട്ട സൈനിക് സ്കൂളിനെയും, പത്താം ക്ലാസ് സിബിഎസ്ഇ പരീക്ഷയിൽ മികച്ച വിജയം നേടിയ സത്താര സൈനിക് സ്കൂളിനെയും, പന്ത്രണ്ടാം ക്ലാസ് സിബിഎസ്ഇ പരീക്ഷയിൽ മികച്ച നേട്ടം കൈവരിച്ച കഴക്കൂട്ടം സൈനിക് സ്കൂളിനെയും മന്ത്രി അഭിനന്ദിക്കുകയും പുരസ്കാരങ്ങൾ വിതരണം ചെയ്യുകയും ചെയ്തു.

സമ്മേളനത്തിന്റെ ഭാഗമായി വിവിധ അജണ്ട വിഷയങ്ങളിലെ ചർച്ചകൾ, സംവേദനാത്മക സെഷനുകൾ, നൂതന വിദ്യാഭ്യാസ സാങ്കേതിക വിദ്യകൾ അവതരിപ്പിച്ച “ഗ്യാൻ മേള” വിദ്യാഭ്യാസ പ്രദർശനം എന്നിവയും സംഘടിപ്പിച്ചു.
100 പുതിയ സൈനിക് സ്കൂളുകൾ സ്ഥാപിക്കാനുള്ള പ്രധാനമന്ത്രി നരേന്ദ്ര മോദിയുടെ ദർശനത്തിന്റെ ഭാഗമായാണ് പുതിയ സ്കൂളുകൾ ആരംഭിക്കുന്നതെന്ന് അധികൃതർ അറിയിച്ചു. ദേശീയ വിദ്യാഭ്യാസ നയവുമായി യോജിപ്പിച്ച് ഗുണനിലവാരമുള്ള വിദ്യാഭ്യാസം കൂടുതൽ വിദ്യാർത്ഥികൾക്ക് ലഭ്യമാക്കുകയും സായുധ സേനകളിലേക്ക് കൂടുതൽ യുവാക്കളെ ആകർഷിക്കുകയുമാണ് പദ്ധതിയുടെ ലക്ഷ്യം. ഇതിനകം 86 പുതിയ സൈനിക് സ്കൂളുകൾക്ക് അംഗീകാരം നൽകിയതിൽ 79 എണ്ണം പ്രവർത്തനം ആരംഭിച്ചതായും അറിയിച്ചു.