ജാതി അധിക്ഷേപത്തിന് ഇരയായ ജയശ്രീക്ക് ജില്ലാ പഞ്ചായത്തിൽ ജോലി; ശക്തമായ സാംസ്കാരിക ബോധം ഉയരണമെന്ന് പ്രമേയം

തിരുവനന്തപുരം: ജാതി അധിക്ഷേപത്തിന് ഇരയായ ഊരൂട്ടമ്പലം സ്വദേശിനി ജയശ്രീക്ക് ജില്ലാ പഞ്ചായത്ത് വിട്ടുകിട്ടിയ സ്ഥാപനത്തിൽ ജോലി നൽകാൻ ജില്ലാ പഞ്ചായത്ത് തീരുമാനിച്ചു. മനുഷ്യസ്നേഹപരമായ സമീപനത്തിന്റെ ഭാഗമായാണ് ഈ തീരുമാനമെന്ന് ജില്ലാ പഞ്ചായത്ത് പ്രസിഡന്റ് വി. പ്രിയദർശിനി അറിയിച്ചു.പരിഷ്കൃത സമൂഹത്തിന് ഒരിക്കലും അംഗീകരിക്കാൻ കഴിയാത്ത ജാതി ബോധത്തിനെതിരെ ശക്തമായ സാംസ്കാരിക ബോധം സമൂഹത്തിൽ ഉയർന്നുവരണമെന്ന് ആവശ്യപ്പെട്ട് ജില്ലാ പഞ്ചായത്ത് പ്രമേയം പാസാക്കി.

ഊരൂട്ടമ്പലം സരസ്വതി സ്കൂളിൽ നടന്ന ജാതി അധിക്ഷേപ സംഭവത്തിനെതിരെ സമൂഹത്തിന്റെ വിവിധ ഭാഗങ്ങളിൽ നിന്ന് ശക്തമായ പ്രതിഷേധമാണ് ഉയർന്നുവന്നത്. നൂറ്റാണ്ടുകൾക്ക് മുൻപ് വിദ്യാഭ്യാസ നവോത്ഥാനത്തിന് തുടക്കം കുറിച്ച ഊരൂട്ടമ്പലത്ത് ഇത്തരം ഹീനമായ ചിന്തകൾക്ക് ഇടം ലഭിക്കുന്നത് ജനാധിപത്യ സമൂഹത്തിന് അംഗീകരിക്കാനാകില്ലെന്നും അതിനെതിരെ സമൂഹം ജാഗ്രതയോടെ ഉണർന്ന് പ്രവർത്തിക്കണമെന്നും പ്രമേയത്തിൽ ആവശ്യപ്പെട്ടു.ജയശ്രീക്ക് തൊഴിൽ നൽകാനുള്ള ജില്ലാ പഞ്ചായത്തിന്റെ തീരുമാനം മനുഷ്യസ്‌നേഹവും സാമൂഹിക നീതിയോടുള്ള പ്രതിബദ്ധതയും ഉയർത്തിക്കാട്ടുന്നതാണെന്നും പ്രസിഡന്റ് വി. പ്രിയദർശിനി വ്യക്തമാക്കി.