ദശാബ്ദങ്ങൾക്ക് ശേഷം ഇടവാക്കുളം ഏലയിൽ കൊയ്ത്തുമേളം

പത്ത് വർഷത്തിലേറെ തരിശായിരുന്ന 20 ഏക്കർ പാടത്ത് നൂറുമേനി വിളവെടുപ്പ്

വർക്കല: ഒരു ദശാബ്ദത്തിലേറെ നീണ്ട ഇടവേളയ്ക്കുശേഷം ഇടവാക്കുളം ഏലയിൽ വീണ്ടും കൊയ്ത്തുമേളം. പത്ത് വർഷത്തിലേറെയായി തരിശായി കിടന്നിരുന്ന 20 ഏക്കറോളം വരുന്ന ഇടവാക്കുളം പാടശേഖരത്തിൽ നെൽകൃഷി വിജയകരമായി പൂർത്തിയാക്കി നൂറുമേനി വിളവെടുപ്പിനൊരുങ്ങിയതിന്റെ ആഹ്ലാദത്തിലാണ് നാട്.

തരിശുനിലങ്ങൾ തിരിച്ചുപിടിച്ച് കൃഷിയിലേക്ക് കൊണ്ടുവരാനുള്ള ഇടവ ഗ്രാമപഞ്ചായത്തിന്റെ ലക്ഷ്യത്തിന് പച്ചക്കൊടി കാട്ടുന്നതായി കൊയ്ത്തുത്സവം. ഇടവ ഗ്രാമപഞ്ചായത്തിലെ ഇടവാക്കുളം പാടശേഖരത്തിലെ നെൽകൃഷിയുടെ കൊയ്ത്തുത്സവം വി. ജോയ് എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്റ് റീതുമോഹൻ അധ്യക്ഷയായി.

വൈസ് പ്രസിഡന്റ് പി.സി. ബാബു, സ്റ്റാൻഡിങ് കമ്മിറ്റി ചെയർമാൻമാരായ ഷൈലജ എസ്., ബിനു ജി., ഷാബിന ടി., മെമ്പർമാരായ എസ്. മോഹനൻ നായർ, രവീന്ദ്രൻ നായർ, റിസ്വാന അഷ്റഫ്, സൽമാൻ ടി.എ., ഓടയം പാടശേഖരസമിതി സെക്രട്ടറി ശശിധരൻ കെ., കൃഷി ഓഫീസർ അനശ്വര ആർ.എസ്., കൃഷി അസിസ്റ്റന്റുമാരായ അനീഷ് എം., യേശുദാസൻ, നൂർനിസ എന്നിവർ പങ്കെടുത്തു. കാർഷിക വികസന സമിതി അംഗങ്ങൾ, കാർഷിക കർമസേന അംഗങ്ങൾ, പാടശേഖരസമിതി പ്രതിനിധികൾ, വിദ്യാർഥികൾ തുടങ്ങിയവരും കൊയ്ത്തുത്സവത്തിൽ പങ്കെടുത്തു.

ഇടവ കാർഷിക കർമസേന, ഓടയം പാടശേഖരസമിതി, ഇടവാക്കുളം ഏലയിലെ കർഷകർ എന്നിവരുടെ കൂട്ടായ പരിശ്രമമാണ് തരിശുനിലത്തെ വീണ്ടും നെൽകൃഷിയിലേക്ക് കൊണ്ടുവന്നത്. പൂർണമായും ജൈവകൃഷി രീതിയിലാണ് കൃഷി നടത്തിയത്. നൂറുമേനി വിളവെടുപ്പിന് പാടശേഖരത്തെ പ്രാപ്തമാക്കിയ കർഷക പ്രതിനിധികളെ ചടങ്ങിൽ എംഎൽഎ ആദരിച്ചു.

നെൽകൃഷിയും കതിർ കൊയ്ത്തും നേരിട്ട് കണ്ടിട്ടില്ലാത്ത വിദ്യാർഥികൾക്കും കൊയ്ത്തുത്സവം നവ്യാനുഭവമായി. ഇടവ എം.ആർ.എം.കെ.എം.എം. ഹയർ സെക്കൻഡറി സ്കൂളിലെ വിദ്യാർഥികളാണ് കൊയ്ത്തുത്സവം കാണാനെത്തിയത്.

ഇടവാക്കുളം ഏലയുടെ ഒരു ഭാഗം ഇതിനകം പാർപ്പിട ആവശ്യങ്ങൾക്കായി ഉപയോഗിച്ചുതുടങ്ങിയിട്ടുണ്ടെങ്കിലും ശേഷിക്കുന്ന ഭൂരിഭാഗം പ്രദേശവും കൃഷിക്ക് ഉപയുക്ത മാക്കണമെന്ന ഗ്രാമപഞ്ചായത്തിന്റെ ലക്ഷ്യത്തിലേക്കുള്ള നിർണായക ചുവടുവയ്പ്പാണ് ഇത്തവണത്തെ വിളവെടുപ്പ്. ദീർഘകാലം തരിശായി കിടന്ന പാടത്ത് വീണ്ടും കതിർമണികൾ നിറഞ്ഞത് ഏലയുടെ പരിസരവാസികൾക്കും ഹൃദ്യമായ അനുഭവമായി.