ഡെലിവറി ബോയിയോട് ക്ഷമ ചോദിച്ചു; ഉപഭോക്താവിന് പുത്തൻ സ്കോഡ കാർ സമ്മാനം

ഡെലിവറി ബോയിയോട് മോശമായി പെരുമാറിയതിന് പിന്നാലെ ക്ഷമ ചോദിച്ച ഉപഭോക്താവിന് പുത്തൻ സ്കോഡ കാർ സമ്മാനമായി നൽകി യുവ സംരംഭകന്റെ വേറിട്ട പ്രതികരണം. 26കാരനായ രുദ്ര ബാനർജിയാണ് ഉപഭോക്താവിന് അപ്രതീക്ഷിത സമ്മാനം നൽകി ശ്രദ്ധ നേടിയത്.

തുറമുഖ ബിസിനസ് മേഖലയിൽ ആയിരത്തോളം ട്രെയിലറുകളുള്ള സംരംഭകനായ രുദ്ര, സാധാരണ തൊഴിലാളികൾ നേരിടുന്ന പ്രയാസങ്ങൾ നേരിട്ട് മനസ്സിലാക്കുന്നതിനായി ഒരു ദിവസം ഫുഡ് ഡെലിവറി ബോയിയായി ജോലി ചെയ്യാൻ തീരുമാനിക്കുകയായിരുന്നു. ഇതിന്റെ ഭാഗമായി അഞ്ച് ഭക്ഷണ ഓർഡറുകൾ അദ്ദേഹം ഏറ്റെടുത്തു.

വൈകിയെത്തുന്ന ഓർഡറുകളാണ് രുദ്ര ഡെലിവറിക്കായി തിരഞ്ഞെടുത്തത്. ഭക്ഷണം വൈകിയതോടെ ചില ഉപഭോക്താക്കൾ ഫോണിൽ പലതവണ വിളിച്ചെങ്കിലും അദ്ദേഹം കോളുകൾ സ്വീകരിച്ചില്ല. ഒടുവിൽ തണുത്ത ഭക്ഷണവുമായി എത്തിയപ്പോൾ ചില ഉപഭോക്താക്കൾ രൂക്ഷമായി പ്രതികരിക്കുകയും ശകാരിക്കുകയും ചെയ്തു. എന്നാൽ ഡെലിവറി ജീവനക്കാരുടെ ജോലി നേരിട്ട് അനുഭവിച്ചറിയുകയായിരുന്ന രുദ്ര ശാന്തനായി പ്രതികരണങ്ങൾ കേട്ടുനിന്നു.

അടുത്ത ദിവസം രാവിലെ അഞ്ച് ഉപഭോക്താക്കളിൽ ഒരാളിൽനിന്ന് രുദ്രയ്ക്ക് വാട്ട്‌സ്ആപ്പ് സന്ദേശം ലഭിച്ചു. വിശപ്പിന്റെ ദേഷ്യത്തിലാണ് തലേദിവസം മോശമായി സംസാരിച്ചതെന്നും ഡെലിവറി ജീവനക്കാരുടെ ജോലി എത്രത്തോളം പ്രയാസകരമാണെന്ന് ഇപ്പോൾ മനസ്സിലാക്കുന്നുവെന്നും വ്യക്തമാക്കിയായിരുന്നു സന്ദേശം. തന്നോട് ക്ഷമിക്കണമെന്നും ഉപഭോക്താവ് അഭ്യർഥിച്ചു.

ഉപഭോക്താവിന്റെ ഈ ക്ഷമാപണവും മാനുഷിക സമീപനവും രുദ്രയെ ആകർഷിച്ചു. അദ്ദേഹത്തിന്റെ പെരുമാറ്റത്തെ അഭിനന്ദിച്ച രുദ്ര, അടുത്ത ആഴ്ച തന്നെ ഉപഭോക്താവിന് പുത്തൻ സ്കോഡ കാർ സമ്മാനമായി നൽകി.ഒരു ചെറിയ ക്ഷമാപണത്തിനും മറ്റൊരാളോടുള്ള മാനുഷിക പരിഗണനയ്ക്കും നൽകിയ ഈ അപ്രതീക്ഷിത അംഗീകാരത്തിന്റെ കഥയാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.