ബ്രിക്സ് വനിതാ വർക്കിംഗ് ഗ്രൂപ്പ്, മന്ത്രിതല യോഗങ്ങൾക്ക് ഇന്ന് മുതൽ കൊച്ചിയിൽ തുടക്കം

കൊച്ചി: ആഗോള സാമ്പത്തിക കൂട്ടായ്മയായ ബ്രിക്സ് (BRICS) രാജ്യങ്ങളുടെ വനിതാ വർക്കിംഗ് ഗ്രൂപ്പ്, മന്ത്രിതല യോഗങ്ങൾക്ക് ഇന്ന് (ജൂലൈ 6) മുതൽ ജൂലൈ 9 വരെ കൊച്ചി വേദിയാകും. കേന്ദ്ര വനിതാ ശിശുവികസന മന്ത്രാലയത്തിന്റെ ആഭിമുഖ്യത്തിൽ ബോൾഗാട്ടി പാലസിലും ഗ്രാൻഡ് ഹയാത്ത് ഹോട്ടലിലുമായി സമ്മേളനം നടക്കും.

ജൂലൈ 6, 7 തീയതികളിൽ വനിതാ വർക്കിംഗ് ഗ്രൂപ്പ് യോഗവും ജൂലൈ 8, 9 തീയതികളിൽ മന്ത്രിതല യോഗവും നടക്കും. “ശാക്തീകരണം, നവീകരണം, സഹകരണം, സുസ്ഥിരത” എന്നതാണ് ഈ വർഷത്തെ സമ്മേളനത്തിന്റെ പ്രമേയം.
ആതിഥേയരാജ്യമായ ഇന്ത്യയ്ക്കൊപ്പം ബ്രസീൽ, ചൈന, ഈജിപ്ത്, എത്യോപ്യ, ഇന്തോനേഷ്യ, ഇറാൻ, റഷ്യ, സൗദി അറേബ്യ, ദക്ഷിണാഫ്രിക്ക, യുഎഇ എന്നീ ബ്രിക്സ് അംഗരാജ്യങ്ങളിൽ നിന്നുള്ള പ്രതിനിധികൾ യോഗങ്ങളിൽ പങ്കെടുക്കും.

ജൂലൈ 8-ന് ആരംഭിക്കുന്ന മന്ത്രിതല യോഗത്തിൽ കേന്ദ്ര വനിതാ ശിശുവികസന വകുപ്പ് മന്ത്രി അന്നപൂർണാ ദേവി പങ്കെടുക്കും. തുടർന്ന് വിവിധ രാജ്യങ്ങളിലെ മന്ത്രിമാർ സംയുക്ത പ്രഖ്യാപനത്തിന്റെ കരട് ചർച്ച ചെയ്യും. ജൂലൈ 9-ന് സമ്മേളന സമാപനത്തോടെ സംയുക്ത വനിതാ മന്ത്രിതല പ്രമേയത്തിന്റെ കരട് അവതരിപ്പിക്കും.

സ്ത്രീശാക്തീകരണം, ഡിജിറ്റൽ-സാമ്പത്തിക ഉൾപ്പെടുത്തൽ, പ്രാദേശിക വനിതാ നേതൃത്വം തുടങ്ങിയ വിഷയങ്ങളിൽ ജൂലൈ 8-ന് പ്രത്യേക പാനൽ ചർച്ചകളും സംഘടിപ്പിച്ചിട്ടുണ്ട്. കേരള വനിതാ ശിശുവികസന വകുപ്പ് മന്ത്രിയും സംസ്ഥാന ചീഫ് സെക്രട്ടറിയും ചർച്ചകളിൽ പങ്കെടുക്കും.

സമ്മേളനത്തിന്റെ ഭാഗമായി ജൂലൈ 8, 9 തീയതികളിൽ ഗ്രാൻഡ് ഹയാത്ത് ഹോട്ടൽ കോമ്പൗണ്ടിൽ പ്രത്യേക പ്രദർശനവും ഒരുക്കിയിട്ടുണ്ട്. നൈപുണ്യ വികസനം, സംരംഭകത്വം, സാമ്പത്തിക പങ്കാളിത്തം, നേതൃപാടവം തുടങ്ങിയ മേഖലകളിൽ ഇന്ത്യ കൈവരിച്ച വനിതാ മുന്നേറ്റങ്ങളാണ് പ്രദർശനത്തിൽ അവതരിപ്പിക്കുക.

ബ്രിക്സ് പ്രോട്ടോക്കോൾ പ്രകാരം മന്ത്രിതല സെഷനുകളിലെ ചർച്ചകൾ രഹസ്യമായിരിക്കും.