വധശ്രമം ഉൾപ്പെടെ 15ഓളം കേസുകൾ; ‘കൊച്ചൻ’ വീണ്ടും കാപ്പാ നിയമപ്രകാരം ജയിലിലായി.

ആറ്റിങ്ങൽ: വധശ്രമം ഉൾപ്പെടെ നിരവധി ക്രിമിനൽ കേസുകളിലെ പ്രതിയെ കാപ്പാ നിയമപ്രകാരം ആറ്റിങ്ങൽ പോലീസ് അറസ്റ്റ് ചെയ്തു. ആറ്റിങ്ങൽ കൊടുമൺ സ്വദേശിയായ ആകാശ്(26) @ കൊച്ചൻ ആണ് പിടിയിലായത്.ആറ്റിങ്ങൽ പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടിരിക്കുന്ന ആകാശ്, നഗരൂർ പോലീസ് സ്റ്റേഷൻ പരിധിയിലെ വധശ്രമക്കേസിൽ പ്രതിയായി ഒളിവിൽ കഴിയുന്നതിനിടെയാണ് പിടിയിലായത്. തിരുവനന്തപുരം റൂറൽ ജില്ലാ പോലീസ് മേധാവി ജുവനപുഡി മഹേഷ് ഐ.പി.എസ്. ൻ്റെ നിർദേശാനുസരണം പ്രതിയെ കാപ്പാ നിയമപ്രകാരം തടങ്കലിൽ പാർപ്പിക്കാൻ ഉത്തരവിട്ടിരുന്നു.

ആറ്റിങ്ങൽ ഡി.വൈ.എസ്.പി സന്തോഷ് കുമാർ ജിയുടെ നേതൃത്വത്തിൽ ആറ്റിങ്ങൽ എസ്.എച്ച്.ഒ അനുരാജ് എം.എച്ച്., എസ്‌.ഐ ഷാൻ, എസ്‌.ഐ സിതാരമോഹൻ, എ.എസ്‌.ഐ ശരത്കുമാർ, ജി.എസ്.സി.പി.ഒ നിതിൻ, ജി.എസ്.സി.പി.ഒ പ്രശാന്ത് എന്നിവർ ഉൾപ്പെട്ട പ്രത്യേക സംഘമാണ് പ്രതിയെ പിടികൂടിയത്.

വധശ്രമം, പിടിച്ചുപറി, മോഷണം തുടങ്ങിയ കേസുകൾ ഉൾപ്പെടെ ആറ്റിങ്ങൽ പോലീസ് സ്റ്റേഷനിൽ മാത്രം 15ഓളം കേസുകളിൽ പ്രതിയാണ് ആകാശ്. ഇയാളെ മുൻപ് മൂന്ന് തവണ കാപ്പാ നിയമപ്രകാരം തടങ്കലിൽ പാർപ്പിച്ചിട്ടുണ്ടെന്നും പോലീസ് അറിയിച്ചു.