പ്രതിരോധ സേനകളുടെ യുദ്ധസജ്ജത വർധിപ്പിക്കാൻ 52,000 കോടി രൂപയുടെ സംഭരണ പദ്ധതികൾക്ക് അനുമതി

ന്യൂഡൽഹി: ഇന്ത്യൻ പ്രതിരോധ സേനകളുടെ യുദ്ധസജ്ജതയും പ്രതിരോധ ശേഷിയും കൂടുതൽ ശക്തിപ്പെടുത്തുന്നതിനായി ഏകദേശം 52,000 കോടി രൂപയുടെ മൂലധന സംഭരണ നിർദേശങ്ങൾക്ക് പ്രതിരോധ സംഭരണ കൗൺസിൽ (Defence Acquisition Council – DAC) തത്വത്തിൽ ഭരണപരമായ അനുമതി (Acceptance of Necessity – AoN) നൽകി. പ്രതിരോധ മന്ത്രി രാജ്‌നാഥ് സിങ്ങിന്റെ അധ്യക്ഷതയിൽ ജൂലൈ 3-ന് ചേർന്ന കൗൺസിൽ യോഗത്തിലാണ് തീരുമാനം.

ഇന്ത്യൻ കരസേനയ്ക്കായി ആന്റി-യുഎവി ഇലക്ട്രോണിക് വാർഫെയർ സിസ്റ്റമായ ‘ആകാശ് തരംഗ്’, മാൻ പോർട്ടബിൾ ആന്റി-ടാങ്ക് ഗൈഡഡ് മിസൈൽ (MPATGM), മീഡിയം റേഞ്ച് സർഫേസ്-ടു-എയർ മിസൈൽ (MRSAM), വെരി ഷോർട്ട് റേഞ്ച് എയർ ഡിഫൻസ് സിസ്റ്റം (V-SHORADS), ടാങ്കുകൾക്കായുള്ള ആക്ടീവ് പ്രൊട്ടക്ഷൻ സിസ്റ്റം, ജെറ്റ് അധിഷ്ഠിത കമികാസെ ഡ്രോൺ സിസ്റ്റം എന്നിവയുടെ സംഭരണത്തിനാണ് അനുമതി ലഭിച്ചത്.

‘ആകാശ് തരംഗ്’ ശത്രുവിന്റെ ഡ്രോൺ ഭീഷണികളെ ഫലപ്രദമായി പ്രതിരോധിക്കാൻ സഹായിക്കുമെന്ന് പ്രതിരോധ മന്ത്രാലയം അറിയിച്ചു. MPATGM കാലാൾപ്പടയുടെ ടാങ്ക് വിരുദ്ധ ശേഷി വർധിപ്പിക്കുമ്പോൾ MRSAM, V-SHORADS എന്നിവ വ്യോമഭീഷണികൾക്കെതിരായ പ്രതിരോധം കൂടുതൽ ശക്തമാക്കും. ടാങ്കുകൾക്കുള്ള ആക്ടീവ് പ്രൊട്ടക്ഷൻ സിസ്റ്റം അവയുടെ അതിജീവനശേഷി ഉയർത്തുകയും ജെറ്റ് അധിഷ്ഠിത കമികാസെ ഡ്രോണുകൾ കൃത്യതയേറിയ ആക്രമണ ശേഷിയും മെച്ചപ്പെട്ട ഇലക്ട്രോണിക് വാർഫെയർ സംവിധാനവും ഉറപ്പാക്കുകയും ചെയ്യും.

ഇന്ത്യൻ നാവികസേനയ്ക്കായി മൾട്ടി ഇൻഫ്ലുവൻസ് ഗ്രൗണ്ട് മൈൻ (MIGM), നേവൽ ഷിപ്പ്ബോൺ അൺമാൻഡ് ഏരിയൽ സിസ്റ്റം (NSUAS) എന്നിവയുടെ സംഭരണത്തിനും ഇലക്ട്രിക് പ്രൊപ്പൽഷൻ സിസ്റ്റത്തിനായുള്ള ലാൻഡ് ബേസ്ഡ് ടെസ്റ്റിംഗ് ഫെസിലിറ്റി (LBTF) സ്ഥാപിക്കുന്നതിനും അംഗീകാരം ലഭിച്ചു.

നൂതന സെൻസറുകളുള്ള NSUAS സമുദ്ര മേഖലയിൽ നിരീക്ഷണ ശേഷിയും സാഹചര്യ അവബോധവും വർധിപ്പിക്കുമെന്ന് പ്രതീക്ഷിക്കുന്നു.ഇന്ത്യൻ വ്യോമസേനയ്ക്കായി ഫിക്സഡ്-വിംഗ് ബേസ്ഡ് ഹൈ ആൾട്ടിറ്റ്യൂഡ് സ്യൂഡോ സാറ്റലൈറ്റ് (FW-HAPS) ഉൾപ്പെടെയുള്ള സംവിധാനങ്ങൾ വാങ്ങുന്നതിനും അനുമതി നൽകി. ദീർഘനേരം ആകാശത്ത് നിലയുറപ്പിച്ച് ഇന്റലിജൻസ്, നിരീക്ഷണം, ടെലികമ്മ്യൂണിക്കേഷൻ, റിമോട്ട് സെൻസിംഗ് തുടങ്ങിയ ദൗത്യങ്ങൾ നിർവഹിക്കാൻ ഈ സംവിധാനം സഹായകമാകും.

പ്രതിരോധ സേനകളുടെ ആധുനികവത്കരണത്തിനും രാജ്യത്തിന്റെ പ്രതിരോധ സജ്ജത കൂടുതൽ ശക്തിപ്പെടുത്തുന്നതിനുമുള്ള സുപ്രധാന തീരുമാനമാണ് ഈ അംഗീകാരമെന്ന് പ്രതിരോധ മന്ത്രാലയം വ്യക്തമാക്കി.