ഗുരു മുനി നാരായണ പ്രസാദ് സമാധി ദിനാചരണം: വർക്കലയിൽ യതിപൂജ നടന്നു

വർക്കല: നാരായണ ഗുരുകുലം അധ്യക്ഷനും ഗുരുവുമായിരുന്ന ഗുരു മുനി നാരായണ പ്രസാദ് സ്വാമിയുടെ സമാധിയോടനുബന്ധിച്ച് വർക്കല നാരായണ ഗുരുകുലത്തിലെ ബ്രഹ്മവിദ്യാമന്ദിരത്തിൽ യതിപൂജ ചടങ്ങ് സംഘടിപ്പിച്ചു.

ശിവഗിരി മഠം സന്യാസി ശ്രേഷ്ഠൻ സ്വാമി ശങ്കരാനന്ദയുടെ നേതൃത്വത്തിലായിരുന്നു യതിപൂജ.ചടങ്ങിൽ ശ്രീനാരായണ ധർമ്മ സംഘം പ്രസിഡന്റ് ബ്രഹ്മശ്രീ സ്വാമി സച്ചിദാനന്ദ മുഖ്യപ്രഭാഷണം നടത്തി. ശ്രീനാരായണ ഗുരുവിന്റെ ശിഷ്യപരമ്പരയിലെ മഹത്തായ സന്യാസിയായിരുന്നു ഗുരു മുനി നാരായണ പ്രസാദ് സ്വാമിയെന്നും സന്യാസി സമൂഹത്തിന് മാതൃകയായ വ്യക്തിത്വമായിരുന്നുവെന്നും അദ്ദേഹം പറഞ്ഞു.

രാവിലെ ഹോമവും ഉപനിഷദ് പാരായണവും നടന്നതിനു ശേഷം നാരായണ ഗുരുകുലം അധ്യക്ഷൻ സ്വാമി ത്യാഗീശ്വരൻ പ്രവചനം നടത്തി. തുടർന്ന് കേരളത്തിനകത്തും പുറത്തുമുള്ള വിവിധ മഠങ്ങളെയും ആശ്രമങ്ങളെയും പ്രതിനിധീകരിച്ച് എത്തിയ സന്യാസിമാർക്ക് യതിപൂജയും ആദരവും നൽകി.

മുൻ മിസോറം ഗവർണർ കുമ്മനം രാജശേഖരൻ, ഖുർആൻ അകമ്പൊരുൾ വ്യാഖ്യാതാവ് മുസ്തഫ മൗലവി, പ്രസാർ ഭാരതി മുൻ ഡയറക്ടർ എസ്. രാധാകൃഷ്ണൻ എന്നിവരടക്കം നൂറിലധികം സന്യാസിമാരും ഗുരുഭക്തരും ചടങ്ങിൽ പങ്കെടുത്തു. വൈകുന്നേരം മോക്ഷദീപം തെളിയിച്ചതോടെ ചടങ്ങുകൾ സമാപിച്ചു.