ഓൺലൈൻ ഗെയിം വഴി പരിചയപ്പെട്ട പെൺകുട്ടിയെ കടത്തിക്കൊണ്ടുപോയ കേസിൽ ആറുമാസത്തിനു ശേഷം പ്രതി അറസ്റ്റിൽ.

ഓൺലൈൻ ഗെയിം വഴി പരിചയപ്പെട്ട പെൺകുട്ടിയെ കടത്തിക്കൊണ്ടുപോയ കേസിൽ ആറുമാസത്തിനു ശേഷം പ്രതി അറസ്റ്റിൽ.

വർക്കല: സോഷ്യൽ മീഡിയയിലൂടെ പരിചയമുണ്ടാക്കി പ്രായപൂർത്തിയാകാത്ത പെൺകുട്ടിയെ തമിഴ്നാട്ടിലേക്ക് കടത്തിക്കൊണ്ടുപോയ കേസിൽ യുവാവിനെ അയിരൂർ പോലീസ് അറസ്റ്റ് ചെയ്തു. തമിഴ്നാട് ധർമപുരി ജില്ലയിലെ ഉദ്ദപ്പട്ടി സ്വദേശിയായ ശക്തിവേൽ (21) ആണ് അറസ്റ്റിലായത്.

അയിരൂർ പോലീസ് പറയുന്നതനുസരിച്ച്, ഓൺലൈൻ ഗെയിമായ ഫ്രീ ഫയർ വഴിയാണ് പ്രതി പെൺകുട്ടിയുമായി പരിചയപ്പെടുകയും പിന്നീട് സൗഹൃദം സ്ഥാപിക്കുകയും ചെയ്തത്. തുടർന്ന് പെൺകുട്ടിയെ കടത്തിക്കൊണ്ടുപോകാനുള്ള ലക്ഷ്യത്തോടെ പ്രതി രണ്ട് സുഹൃത്തുക്കളോടൊപ്പം പെൺകുട്ടിയുടെ വീട്ടിലെത്തി പ്രലോഭിപ്പിച്ച് തമിഴ്നാട്ടിലേക്ക് കൊണ്ടുപോയതായി അന്വേഷണത്തിൽ കണ്ടെത്തി.

തമിഴ്നാട്ടിലെത്തിച്ച പെൺകുട്ടിയെ ആദ്യം രണ്ടാം പ്രതിയുടെ വീട്ടിൽ താമസിപ്പിച്ച ശേഷം, നാട്ടിലേക്ക് തിരികെ കൊണ്ടുപോകാമെന്ന് വിശ്വസിപ്പിച്ച് മറ്റൊരു സ്ഥലത്തേക്ക് മാറ്റി പാർപ്പിക്കുകയും അവിടെ വെച്ച് ലൈംഗികാതിക്രമത്തിന് ഇരയാക്കുകയും ചെയ്തതായി പോലീസ് അറിയിച്ചു.

2025 ഡിസംബർ 8-ന് പെൺകുട്ടിയെ കാണാതായതിനെ തുടർന്ന് വീട്ടുകാർ അയിരൂർ പോലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്ത പോലീസ് അന്വേഷണം ആരംഭിക്കുകയും തുടർന്ന് പെൺകുട്ടിയെ കണ്ടെത്തുകയും ചെയ്തു. എന്നാൽ പ്രതികൾ ഒളിവിൽ പോയതിനാൽ ഇവരെ പിടികൂടാൻ കഴിഞ്ഞിരുന്നില്ല.

പ്രതികൾക്കായി പോലീസ് അന്വേഷണം തുടരുന്നതിനിടെ ഏഴ് മാസങ്ങൾക്ക് ശേഷം തമിഴ്നാട്ടിൽ നിന്നാണ് പ്രധാന പ്രതിയായ ശക്തിവേലിനെ പിടികൂടിയത്. കസ്റ്റഡിയിലെടുത്ത പ്രതിയുടെ അറസ്റ്റ് രേഖപ്പെടുത്തിയ ശേഷം വർക്കല കോടതിയിൽ ഹാജരാക്കി റിമാൻഡ് ചെയ്തു.

കേസിലെ മറ്റ് പ്രതികൾക്കായുള്ള അന്വേഷണം തുടരുകയാണെന്ന് പോലീസ് അറിയിച്ചു.