എറണാകുളം: മുന്‍ ധനമന്ത്രി തോമസ് ഐസക്കിനെ വിടാതെ ഇ.ഡി. മസാല ബോണ്ട് ഇടപാടിലെ നിയമസാധുത പരിശോധിക്കുന്ന കാര്യത്തില്‍ തോമസ് ഐസക്കിന്റെ മൊഴിയെടുക്കല്‍ അനിവാര്യമാണെന്ന് ഇ.ഡി ഹൈക്കോടതിയില്‍ വ്യക്തമാക്കി. അന്വേഷണ നടപടികളില്‍ കോടതി സ്റ്റേ അനുവദിച്ചിട്ടില്ലെന്നും അതിനാലാണ് ഐസക്കിന് വീണ്ടും സമന്‍സ് അയച്ചതെന്നും ഇ.ഡി കോടതിയെ അറിയിച്ചു. അതോടൊപ്പം മസാല ബോണ്ട് ഇടപാടുകളില്‍ തീരുമാനം കൈക്കൊണ്ട വ്യക്തികളുടെ മൊഴിയെടുക്കുന്നതും പ്രധാനമാണെന്നും ഹൈക്കോടതിയില്‍ ഇ.ഡി സമര്‍പ്പിച്ച സത്യവാങ്മൂലത്തില്‍ വ്യക്തമാക്കുന്നു. ഇ.ഡി നടപടികളില്‍ നിന്നും ഒഴിഞ്ഞുമാറുന്ന ഐസക്ക് മാധ്യമങ്ങള്‍ക്കു മുന്നില്‍ കോടതിയേയും, അധികാരികളെയും വെല്ലുവിളിക്കുന്നുവെന്നും സത്യവാങ്മൂലത്തില്‍ പറയുന്നു.
അതേസമയം, കോടതി ഉത്തരവ് പ്രകാരം അന്വേഷണവുമായി സഹകരിച്ചുവെന്ന് കിഫ്ബി ഹൈകോടതിയെ അറിയിച്ചു. ഹര്‍ജികള്‍ അവധിയ്ക്ക് ശേഷം പരിഗണിക്കാനായി മാറ്റി. അടിയന്തര സാഹചര്യമുണ്ടായാല്‍ ഹര്‍ജിക്കാര്‍ക്ക് കോടതിയെ സമീപിക്കാമെന്നും ജസ്റ്റിസ് ടി.ആര്‍.രവി പറഞ്ഞു. കേസ് ഇനി മെയ് 22 ന് വീണ്ടും പരിഗണിക്കും. മസാല ബോണ്ട് ഇറക്കാന്‍ തീരുമാനിച്ച വ്യക്തി എന്ന നിലയിലും, കിഫ്ബി സമര്‍പ്പിച്ച രേഖകള്‍ പരിശോധിച്ചതിന്റെ അടിസ്ഥാനത്തിലുമാണ് തോമസ് ഐസക്കിന് പുതിയ സമന്‍സ് നല്‍കിയതെന്നാണ് ഇ.ഡി നിലപാട്. എന്നാല്‍, ഇഡി നീക്കം രാഷ്ട്രീയപ്രേരിതമെന്നാണ് ഐസക്കിന്റെ വാദം.
