നിർത്തിയ ക്രെയിനിൽ ഇടിച്ച് സ്കൂൾ ബസ് അപകടം; ഡ്രൈവർ മരിച്ചു, അഞ്ചുപേർക്ക് പരിക്ക്

കല്ലമ്പലം: നാവായിക്കുളം തട്ടുപാലം ദേശീയപാതയ്ക്കരുകിൽ നിർത്തിയിട്ടിരുന്ന ക്രെയിനിന്റെ പിന്നിൽ സ്കൂൾ ബസ് ഇടിച്ച് ഗുരുതര അപകടം. നഗരൂർ നെടുംപറമ്പ് സ്വദേശിയായ ഷാജി (56) ആണ് മരിച്ചത്. വർക്കല അയിരൂർ എംജിഎം മോഡൽ സ്കൂളിന്റെ ബസ്സാണ് അപകടത്തിൽപ്പെട്ടത്. ബസ്സിൽ ഡ്രൈവറോടൊപ്പം സ്കൂളിലെ അഞ്ച് വനിതാ ജീവനക്കാരുമുണ്ടായിരുന്നു. ഇവരായ ജയശ്രീ, ശോഭ, ബിന്ദു മോൾ, റീന, വിനീത റാണി എന്നിവർക്ക് കൈകാലുകളിൽ പൊട്ടൽ സംഭവിച്ച് പാരിപ്പള്ളി മെഡിക്കൽ കോളേജിൽ ചികിത്സ തുടരുന്നു.

ഇന്ന് രാവിലെ 10.45ഓടെയായിരുന്നു സംഭവം. അപകടവിവരം ലഭിച്ചതിനെ തുടർന്ന് കല്ലമ്പലം ഫയർഫോഴ്‌സ് സംഘം സ്ഥലത്തെത്തി രക്ഷാപ്രവർത്തനം നടത്തി. ബസ്സിനുള്ളിൽ കുടുങ്ങിക്കിടന്ന ഡ്രൈവറെ വാഹനം വെട്ടിപ്പൊളിച്ച് പുറത്തെടുത്ത് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

പുതിയ അധ്യയന വർഷത്തെ മുന്നോടിയായി സ്കൂൾ ബസിന്റെ റൂട്ടുകൾ പരിശോധിക്കാൻ ജീവനക്കാർ യാത്ര ചെയ്യുന്നതിനിടെയാണ് അപകടമുണ്ടായത്.
സ്റ്റേഷൻ ഓഫീസർ കെ. സതീഷ് കുമാർ, ഗ്രേഡ് സ്റ്റേഷൻ ഓഫീസർ സജിത്ത് ലാൽ എസ്.ഡി., ഫയർ റെസ്ക്യൂ ഓഫീസർമാരായ സന്തോഷ് ബി., പ്രവീൺ പി., അരവിന്ദൻ എം., സജികുമാർ ടി.ആർ., അരവിന്ദ് ആർ., ഷൈജു എസ്., സണ്ണി ആർ., ഹെഡ് ഗാർഡ് അനിൽ കുമാർ ജി. എന്നിവരുടെ നേതൃത്വത്തിലുള്ള ഫയർഫോഴ്‌സ് സംഘമാണ് രക്ഷാപ്രവർത്തനത്തിൽ പങ്കെടുത്തത്.
സംഭവസ്ഥലത്ത് സമയോചിതമായി ഫയർഫോഴ്സ് നടത്തിയ ഇടപെടലിലൂടെ പരിക്കേറ്റവരെ വേഗത്തിൽ ആശുപത്രിയിലെത്തിക്കാൻ സാധിച്ചതായി നാട്ടുകാർ പറഞ്ഞു.