അങ്കണവാടി കുട്ടികളോടൊപ്പം ഫലവൃക്ഷത്തൈ നട്ട് പരിസ്ഥിതി ദിനം ആചരിച്ചു

വർക്കല: ലോക പരിസ്ഥിതി ദിനാചരണത്തിന്റെ ഭാഗമായി വർക്കല നഗരസഭയിലെ കല്ലംകോണം വാർഡിലെ പന്തുകളം അങ്കണവാടിയിൽ വിവിധ പരിപാടികൾ സംഘടിപ്പിച്ചു. അങ്കണവാടിയിലെ കുട്ടികളോടൊപ്പം ഫലവൃക്ഷത്തൈ നട്ടുകൊണ്ട് വർക്കല നഗരസഭ പൊതുമരാമത്ത് സ്ഥിരം സമിതി അധ്യക്ഷൻ സജി ബി പരിപാടി ഉദ്ഘാടനം ചെയ്തു.പരിസ്ഥിതി സംരക്ഷണത്തിന്റെയും പ്രകൃതി സംരക്ഷണത്തിന്റെയും പ്രാധാന്യം പുതിയ തലമുറയ്ക്ക് പകർന്നു നൽകുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. അങ്കണവാടിയിലെ കൊച്ചു കൂട്ടുകാർ ആവേശപൂർവം പരിപാടിയിൽ പങ്കുചേർന്നു.

പരിസ്ഥിതി സംരക്ഷണം ഓരോരുത്തരുടെയും ഉത്തരവാദിത്തമാണെന്നും വൃക്ഷത്തൈകൾ നട്ട് പരിപാലിക്കുന്നതിലൂടെ ഹരിതാഭമായ നാളെയെ വാർത്തെടുക്കാൻ കഴിയുമെന്നും സജി ബി ഉദ്ഘാടന പ്രസംഗത്തിൽ പറഞ്ഞു. അങ്കണവാടി ജീവനക്കാർ, രക്ഷിതാക്കൾ, വാർഡിലെ ജനപ്രതിനിധികൾ, നാട്ടുകാർ എന്നിവർ പരിപാടിയിൽ പങ്കെടുത്തു. ലോക പരിസ്ഥിതി ദിനത്തോടനുബന്ധിച്ച് വൃക്ഷത്തൈ വിതരണം, പരിസ്ഥിതി സംരക്ഷണ സന്ദേശ പ്രചാരണം തുടങ്ങിയ പ്രവർത്തനങ്ങളും സംഘടിപ്പിച്ചു.