കൊല്ലം ജില്ലാ ആശുപത്രി ലബോറട്ടറിയിൽ ജീവനക്കാരുടെ കുറവ്; പരിശോധനാഫലം കാത്ത് രോഗികൾ നീണ്ട ക്യൂവിൽ

രക്തസാമ്പിളുകൾ ശേഖരിക്കാനും പരിശോധനാഫലം നൽകാനും ഒരേയൊരു ജീവനക്കാരി; രോഗികൾക്ക് ദുരിതം

കൊല്ലം: ജില്ലാ ആശുപത്രിയിൽ ഏറ്റവും കൂടുതൽ രോഗികൾ ആശ്രയിക്കുന്ന ലബോറട്ടറിയിൽ ആവശ്യത്തിന് ജീവനക്കാരില്ലാത്തത് രോഗികൾക്കും കൂട്ടിരിപ്പുകാർക്കും വലിയ ബുദ്ധിമുട്ടുണ്ടാക്കുന്നു.രക്തപരിശോധനയ്ക്കായി സാമ്പിളുകൾ ശേഖരിക്കുന്നതിനും പരിശോധനാഫലങ്ങൾ വിതരണം ചെയ്യുന്നതിനും ആവശ്യമായ ജീവനക്കാരുടെ അഭാവമാണ് രോഗികളെ ദുരിതത്തിലാക്കുന്നത്.

ചൊവ്വാഴ്ച ഉച്ചയ്ക്ക് 2.30 മുതൽ ലബോറട്ടറിക്ക് മുന്നിൽ രോഗികളും കൂട്ടിരിപ്പുകാരും തടിച്ചുകൂടിയ കാഴ്ചയായിരുന്നു. ലബോറട്ടറിയിൽ ഒരു വനിതാ ജീവനക്കാരി മാത്രമാണ് സേവനത്തിനുണ്ടായി രുന്നത്.രക്തസാമ്പിളുകൾ ശേഖരിക്കുന്നതും പരിശോധനാ ഫലങ്ങൾ നൽകുന്നതും ഉൾപ്പെടെയുള്ള ജോലികൾ ഒരാൾക്ക് മാത്രം നിർവഹിക്കേണ്ടിവരുന്നത് സേവനത്തിന്റെ വേഗതയെ ബാധിക്കുന്ന സാഹചര്യമാണ് ഉണ്ടായത്.

പരിശോധനാഫലം ലഭിക്കാനായി അരമണിക്കൂറിലധികം ക്യൂവിൽ കാത്തുനിൽക്കേണ്ട അവസ്ഥയിലായിരുന്നു നിരവധി രോഗികൾ. വിവിധ രോഗങ്ങളുമായി ചികിത്സ തേടിയെത്തുന്നവരും തുടർചികിത്സയ്ക്കായി പരിശോധനാഫലം അത്യാവശ്യമായവരും ഏറെ നേരം കാത്തുനിൽക്കേണ്ടിവരുന്നത് പ്രയാസം വർധിപ്പിക്കുന്നു. രോഗികൾക്കൊപ്പം എത്തിയ കൂട്ടിരിപ്പുകാർക്കും ലബോറട്ടറിക്ക് മുന്നിലെ തിരക്ക് ബുദ്ധിമുട്ടായി.

ജില്ലാ ആശുപത്രിയിൽ ചികിത്സ തേടിയെത്തുന്ന രോഗികൾക്ക് ഏറ്റവും അത്യാവശ്യമായ സേവനങ്ങളിലൊന്നാണ് ലബോറട്ടറിയിലെ രക്തപരിശോധന. രോഗനിർണയത്തിനും തുടർചികിത്സ തീരുമാനിക്കുന്നതിനും പരിശോധനാഫലങ്ങൾ നിർണായകമാണ്. ഇത്തരമൊരു വിഭാഗത്തിൽ ആവശ്യത്തിന് ജീവനക്കാരെ നിയോഗിക്കാത്തത് രോഗികൾക്ക് സമയബന്ധിതമായി സേവനം ലഭിക്കുന്നതിനെ ബാധിക്കുന്നതായി ചൂണ്ടിക്കാണിക്കപ്പെടുന്നു.

രോഗികളുടെ എണ്ണം കണക്കിലെടുത്ത് ലബോറട്ടറിയിൽ ആവശ്യമായ ജീവനക്കാരെ നിയോഗിക്കേണ്ടത് അത്യാവശ്യമാണ്. സാമ്പിളുകൾ ശേഖരിക്കുന്നതിനും പരിശോധനാഫലങ്ങൾ വിതരണം ചെയ്യുന്നതിനും മതിയായ ജീവനക്കാരെ ഉറപ്പാക്കാൻ ആശുപത്രി അധികൃതർ നടപടി സ്വീകരിക്കണമെന്ന ആവശ്യവും ഉയരുന്നു. രോഗികൾക്ക് ദീർഘനേരം കാത്തുനിൽക്കാതെ പരിശോധനാഫലങ്ങൾ ലഭിക്കുന്നതിനുള്ള ക്രമീകരണങ്ങൾ ഏർപ്പെടുത്തേണ്ടതുണ്ട്.