ശിവഗിരിയിൽ ശ്രീനാരായണ ദിവ്യ സത്‌സംഗവും ആത്മോപദേശ ശതക പഠനവും

വർക്കല: ശ്രീനാരായണ ദിവ്യദർശനം ജനഹൃദയങ്ങളിലെത്തിക്കുക എന്ന ലക്ഷ്യത്തോടെ ശിവഗിരിയിൽ എല്ലാ മാസവും രണ്ടാം ശനിയാഴ്ചയും ഞായറാഴ്ചയും സംഘടിപ്പിക്കുന്ന ശ്രീനാരായണ ദിവ്യ സത്‌സംഗവും ‘ആർക്കും പഠിക്കാം ആത്മോപദേശ ശതകം’ പഠന ക്ലാസും നടന്നു.

ഗുരുധർമ്മപ്രചരണ സഭ കേന്ദ്ര സെക്രട്ടറി സ്വാമി അസംഗാനന്ദഗിരി പരിപാടി ഉദ്ഘാടനം ചെയ്തു. ശ്രീനാരായണ ഗുരു രചിച്ച ആത്മോപദേശ ശതകം ആസ്പദമാക്കി പ്രശ്നോത്തരി മത്സരം സംഘടിപ്പിക്കുകയും വിജയികൾക്ക് സമ്മാനങ്ങൾ വിതരണം ചെയ്യുകയും ചെയ്തു.

രണ്ടാം ദിവസം ‘ഗുരുദർശനം സ്വജീവിതത്തിൽ’ എന്ന വിഷയത്തിൽ സ്വാമി ത്രിരത്ന തീർത്ഥ പഠന ക്ലാസ് നയിച്ചു. മഹാശാന്തി ഹവനവും സർവ്വൈശ്വര്യ പൂജയും നടന്നു.

ഗുരുധർമ്മപ്രചരണ സഭ ജോയിന്റ് രജിസ്ട്രാർ പുത്തൂർ ശോഭനൻ, ഉപദേശക സമിതി കൺവീനർ സതീശൻ അത്തിക്കാട്, മോഹനൻ പഞ്ഞിവിള എന്നിവർ വിവിധ പഠന ക്ലാസുകൾക്ക് നേതൃത്വം നൽകി.
സഭ പി.ആർ.ഒ. ഡോ. സനൽകുമാർ, മാതൃസഭ കേന്ദ്ര സെക്രട്ടറി ജി.ആർ. ശ്രീജ, സഭ കേന്ദ്ര എക്സിക്യൂട്ടീവ് അംഗം ആറ്റിങ്ങൽ കൃഷ്ണൻകുട്ടി എന്നിവർ പങ്കെടുത്തു.