കാർഗിൽ വിജയ ദിവസം: ഇന്ത്യൻ വ്യോമസേന ട്രെയിനിംഗ് കമാൻഡിൽ പുഷ്പചക്രാർപ്പണ ചടങ്ങ്

ബെംഗളൂരു: കാർഗിൽ വിജയ് ദിവസ് ആചരിച്ച് ഇന്ത്യൻ വ്യോമസേനയുടെ ട്രെയിനിംഗ് കമാൻഡ് ആസ്ഥാനത്ത് പുഷ്പചക്രാർപ്പണ ചടങ്ങ് സംഘടിപ്പിച്ചു.
ജൂലൈ 26-ന് ബെംഗളൂരുവിലെ ട്രെയിനിംഗ് കമാൻഡ് യുദ്ധസ്മാരകത്തിൽ നടന്ന ചടങ്ങിൽ രാജ്യരക്ഷയ്ക്കായി ജീവൻ ബലിയർപ്പിച്ച ഇന്ത്യൻ പ്രതിരോധ സേനാംഗങ്ങൾക്ക് ആദരാഞ്ജലി അർപ്പിച്ചു.

രാജ്യത്തിന്റെ അഭിമാനത്തിന്റെയും വരുംതലമുറകൾക്ക് പ്രചോദനത്തിന്റെയും പ്രതീകമായി കാർഗിൽ വീരരുടെ ധീരത എന്നും സ്മരിക്കപ്പെടുമെന്ന് ചടങ്ങിൽ അനുസ്മരിച്ചു.

ട്രെയിനിംഗ് കമാൻഡ് എയർ ഓഫീസർ കമാൻഡിംഗ്-ഇൻ-ചീഫ് എയർ മാർഷൽ എസ്. ശ്രീനിവാസിന്റെ നേതൃത്വത്തിൽ ട്രെയിനിംഗ് കമാൻഡിലെ മുതിർന്ന ഉദ്യോഗസ്ഥർ വീരജവാൻമാർക്ക് പുഷ്പചക്രം സമർപ്പിച്ച് ആദരാഞ്ജലി അർപ്പിച്ചു. ഇന്ത്യൻ സൈന്യത്തിന്റെയും നാവികസേനയുടെയും പ്രതിനിധികളും ചടങ്ങിൽ പങ്കെടുത്തു.

ഗാർഡ് ഓഫ് ഓണർ (സലാമി ശസ്ത്ര) അർപ്പണത്തോടെയാണ് ചടങ്ങുകൾ ആരംഭിച്ചത്. തുടർന്ന് ‘ശോക് ശസ്ത്ര’ ആചാരവും ബഗ്ലർമാർ ‘ലാസ്റ്റ് പോസ്റ്റ്’ സംഗീതവും അവതരിപ്പിച്ചു. രണ്ട് മിനിറ്റ് മൗനം ആചരിച്ചതോടെയാണ് ചടങ്ങുകൾ സമാപിച്ചത്.