മൊബൈൽ നമ്പർ പോർട്ട് ചെയ്യാൻ അനുവദിച്ചില്ല : മാതാപിതാക്കളെ കൊലപ്പെടുത്തിയ പ്രതിക്ക് മാനസിക അസ്വസ്ഥതകളില്ലെന്ന് മെഡിക്കൽ റിപ്പോർട്ട്

മൊബൈൽ നമ്പർ പോർട്ട് ചെയ്യാൻ അനുവദിക്കാത്തതിന് മാതാപിതാക്കളെ കൊലപ്പെടുത്തിയ പ്രതിക്ക് മാനസിക അസ്വസ്ഥതകളില്ലെന്ന് മെഡിക്കൽ റിപ്പോർട്ട്

ബെംഗളൂരു: വിജ്ഞാൻ നഗരിലെ വില്ലയിൽ റിട്ടയേർഡ് നേവി ക്യാപ്റ്റൻ നവീൻ ചന്ദ്ര ഭട്ടിനെയും ഭാര്യ ശ്യാമള ഭട്ടിനെയും കുത്തിക്കൊലപ്പെടുത്തിയ കേസിൽ അന്വേഷണം നിർണായക ഘട്ടത്തിലെത്തി. പ്രതിയായ മകൻ രോഹൻ ചന്ദ്രയ്ക്ക് മാനസിക അസ്വസ്ഥതകളൊന്നുമില്ലെന്ന് നിംഹാൻസ് ആശുപത്രിയുടെ മെഡിക്കൽ റിപ്പോർട്ട് വ്യക്തമാക്കിയതായി പൊലീസ് അറിയിച്ചു. കുടുംബപരമായ തർക്കങ്ങളാണ് കൊലപാതകത്തിന് പിന്നിലെ പ്രധാന കാരണമെന്നും കുറ്റപത്രത്തിൽ ചൂണ്ടിക്കാട്ടുന്നു.

കഴിഞ്ഞ ഫെബ്രുവരിയിലായിരുന്നു ബെംഗളൂരുവിനെ നടുക്കിയ ഇരട്ടക്കൊലപാതകം നടന്നത്. സംഭവത്തിനു പിന്നാലെ പ്രതിയായ 33 കാരനായ സോഫ്റ്റ്‌വെയർ എൻജിനീയർ രോഹൻ ചന്ദ്രയ്ക്ക് സ്കീസോഫ്രീനിയ ഉൾപ്പെടെയുള്ള മാനസിക പ്രശ്നങ്ങൾ ഉണ്ടായിരുന്നോയെന്ന സംശയം അന്വേഷണസംഘം പരിശോധിച്ചിരുന്നു. കുടുംബവുമായി അടുത്ത ബന്ധമുള്ള ഡോക്ടറുടെ മൊഴിയുടെ അടിസ്ഥാനത്തിലായിരുന്നു രോഹനെ നിംഹാൻസിൽ നിരീക്ഷണത്തിനും പരിശോധനകൾക്കുമായി പ്രവേശിപ്പിച്ചത്.എന്നാൽ, ഒരാഴ്ച നീണ്ട പരിശോധനകൾക്ക് ശേഷം രോഹന് മാനസിക രോഗങ്ങളൊന്നുമില്ലെന്നും ചോദ്യം ചെയ്യലിനും നിയമനടപടികൾക്കും യോഗ്യനാണെന്നും ഡോക്ടർമാർ റിപ്പോർട്ട് നൽകി. ഇതോടെ അന്വേഷണം കൂടുതൽ ശക്തമാക്കിയതായി വൈറ്റ്ഫീൽഡ് ഡെപ്യൂട്ടി പൊലീസ് കമ്മീഷണർ സന്ദീപ് അറോറ വ്യക്തമാക്കി.

അമേരിക്കയിൽ നിന്ന് ആർട്ടിഫിഷ്യൽ ഇന്റലിജൻസിൽ ബിരുദാനന്തര ബിരുദം നേടിയ രോഹൻ, എഐ സ്റ്റാർട്ടപ്പ് ആരംഭിക്കാൻ മാതാപിതാക്കളോട് പണം ആവശ്യപ്പെട്ടിരുന്നുവെന്നാണ് അന്വേഷണത്തിൽ കണ്ടെത്തിയത്. ജോലി കണ്ടെത്തിയതിന് ശേഷമേ സാമ്പത്തിക സഹായം നൽകാനാകൂവെന്ന മാതാപിതാക്കളുടെ നിലപാടും, മൊബൈൽ നമ്പർ പോർട്ടിംഗിനെച്ചൊല്ലിയ തർക്കവും വീട്ടിലെ സംഘർഷം രൂക്ഷമാക്കിയതായും പൊലീസ് പറയുന്നു.

ഫെബ്രുവരി 11ന് ഉണ്ടായ വാക്കുതർക്കത്തിനൊടുവിൽ കൊലപാതകം നടന്നതായാണ് അന്വേഷണസംഘത്തിന്റെ നിഗമനം. കേസിൽ 40ഓളം സാക്ഷിമൊഴികളും ഫോറൻസിക് തെളിവുകളും ഉൾപ്പെടുത്തി 500 പേജുകളുള്ള കുറ്റപത്രം കോടതിയിൽ സമർപ്പിച്ചു. പ്രതിയുടെ വസ്ത്രത്തിൽ കണ്ടെത്തിയ രക്തക്കറകൾ കൊല്ലപ്പെട്ട മാതാപിതാക്കളുടെതാണെന്ന് ഫോറൻസിക് പരിശോധനയിൽ സ്ഥിരീകരിച്ചതായും പൊലീസ് അറിയിച്ചു.